SPAK po bën shou me dosjen e Olsi Ramës

SPAK nuk ka nevojë të na informojë nëse është kallëzuar apo jo vëllai i kryeministrit. Ky institucion ka të drejtën të nisë hetimet kryesisht bazuar në të dhënat që kanë dalë në dritë.

Prokuroria e Posaçme duket se ka filluar të bëjë shou me dosjen e “Xibrakës”. Pas denoncimit nga PD, hetimet u rihapën, por shohim lojëra rreth çështjes nëse Olsi Rama është kallëzuar apo jo. Fillimisht, SPAK publikoi një letër për Gazment Bardhin, duke deklaruar se ai nuk e kishte paditur Olsi Ramën dhe prandaj nuk kishte regjistruar padinë e vëllait të kryeministrit ndaj deputetit.

Të premten, Olsi Rama u paraqit sërish në SPAK, duke dhuruar spektakël para prokurorisë. Ai kërkoi një letër nga prokuroria që i konfirmonte për herë të dytë se nuk kishte padi ndaj tij. Këto skena janë të pavlera dhe nuk arrijnë të manipulojnë opinionin publik.

SPAK nuk ka nevojë të na tregojë nëse është kallëzuar apo jo vëllai i kryeministrit. Ky institucion ka të drejtën të nisë hetimet kryesisht bazuar në të dhënat që kanë dalë. Aktualisht, hetimet janë fokusuar në arsyet pse u mbyll fraksioni i dosjes “Xibraka” dhe mbi personin e paidentifikuar nga policia.

SPAK duket se po përpiqet të tregojë se po “shpik raketën”, ndërkohë që ky rast është shumë i thjeshtë. Mjafton të dërgojë një letër te homologët në Hanover, Gjermani, ku policia zbuloi laboratorin e Xibrakës. Ata kanë përgjime, foto, video dhe të dhëna mbi të gjithë grupin që operonte. Një letër-porosi do të sjellë gjithë dosjen në Tiranë, duke zbuluar qartë nëse vëllai i kryeministrit është i përfshirë apo jo.

SPAK po heton gjithashtu nëse ka pasur dekonspirim apo mbyllje të qëllimtë të hetimeve. Hetimet janë zhvilluar nga Olsian Çela, Edvin Kondili dhe Neritan Nallbati. Pyetja e këtyre personave do të zbulojë nëse kemi të bëjmë me vëllanë e kryeministrit apo jo. Dosja dhe fashikujt janë të disponueshëm.

Nëse SPAK ka guximin të merret me vëllanë e kryeministrit, kjo çështje është e thjeshtë për t’u zgjidhur. Nëse synimi është të krijohet shou politik, atëherë kjo është një lojë shumë e pështirë që nuk i takon SPAK-ut.