Tensionet te Kuvendi, Erion Braçe: Ra shteti!

Deputeti i Partisë Socialiste, Erion Braçe, ka reaguar pas incidenteve të ndodhura gjatë protestës së zhvilluar jashtë Kuvendit të Shqipërisë, ku u shënuan përplasje mes protestuesve dhe forcave të Policisë së Shtetit.

Në një video të publikuar në rrjetet sociale, Braçe dënoi dhunën ndaj efektivëve të policisë, duke e konsideruar atë një kërcënim serioz për rendin dhe stabilitetin e vendit. Ai theksoi se situata gjatë protestës ka qenë e tensionuar dhe se janë sulmuar deputetë pa dallim.

Deputeti socialist u ndal veçanërisht te sulmet ndaj uniformës së policisë, duke paralajmëruar për pasojat që mund të sjellë dobësimi i autoritetit të shtetit.

Deklarata e plotë e Erion Braçes:

“Prej gati tre orësh, në rrethinat e Parlamentit, në hyrje dhe dalje të tij, janë sulmuar deputetët e Kuvendit të Shqipërisë. Nuk janë sulmuar vetëm deputetët e Partisë Socialiste, por çdo deputet, jo vetëm burrat, por edhe gratë.

Tani dua t’i drejtohem Policisë së Shtetit. Në rast se i keni shoqëruar, ose kërkoni t’i shoqëroni sepse kanë qëlluar me vezë makinën time, bëni një gabim shumë të madh. Gjërat e mia di t’i zgjidh vetë. Nuk kam pasur nevojë për askënd sot dhe nuk kam nevojë as tani. Ajo që mua më shqetëson është dora e ngritur dhe goditja ndaj policit të shtetit.

Nëse goditet një deputet, natyrisht është e rëndë, sepse ka të bëjë me sovranitetin e Kuvendit. Por në rast se goditet polici i shtetit, kjo nuk është ‘Shqipëria e re’, por është kaosi i ri. Sepse, nëse bie polici i shtetit, bie shteti.

Nuk bie as Partia Socialiste dhe nuk bie as sistemi për të cilin dërdëllisin këta në rrjetet sociale, por bie shteti. Ky vend e ka vuajtur shumë rënien e shtetit. Shikojeni foton duke u goditur polici i shtetit”, deklaroi Braçe.

Reagimi i tij vjen në një kohë tensionesh të larta politike, ku protestat dhe përplasjet kanë rikthyer debatin mbi sigurinë publike dhe funksionimin e institucioneve në vend.