Thirrja për ndihmë: Shpëtojini jetën Altinit, i riu po lufton me vdekjen!

Altin Belba, një djalë i ri nga Prrenjasi, ka lindur me një problem të rëndë shëndetësor “hipertension portal”, një gjendje kritike që ka vënë jetën e tij në rrezik të përhershëm. Për shkak të kësaj sëmundjeje të rrallë, ai duhet të marrë transfuzion gjaku një herë në muaj, duke kaluar periudha të vështira që kanë rrezikuar disa herë jetën e tij.

Mjekët në Shqipëri kanë bërë gjithçka që kanë mundur për të mbajtur Altinin në jetë, por për fat të keq, vendi ynë nuk ofron mundësinë e ndërhyrjes së specializuar që ai ka nevojë. Sëmundja e tij kërkon një operacion të ndërlikuar dhe trajtime të shtrenjta që kapin shifra prej mijëra eurosh, të cilat janë përtej mundësive financiare të familjes së tij. Fatmirësisht, një klinikë jashtë Shqipërisë ka pranuar të trajtojë Altinin, duke i ofruar atij një mundësi për shërim dhe një jetë më të mirë.

Familja e Altinit është në kërkim të mbështetjes për të mbledhur fondet e nevojshme për këtë ndërhyrje. Ne ju bëjmë thirrje të gjithë atyre që kanë mundësi të ndihmojnë, që të japin kontributin e tyre për të shpëtuar jetën e këtij të riu të mrekullueshëm.Çdo ndihmë, sado e vogël, mund të bëjë një ndryshim të madh dhe t’i japë Altinit një shans për të jetuar një jetë normale.

Le të bashkohemi për të dhuruar jetën që ai meriton!