Tirana mposht Vllazninë në Shkodër

FUTBOLL – Tirana siguroi fitoren e katërt radhazi në Kategorinë Superiore, duke fituar 2-0 kundër Vllaznisë në Shkodër, falë golave të Xhixhës dhe Seferit në secilën pjesë.

Bardheblutë, euforikë nga fitorja në derbi të hënën, treguan qetësi në sfidën delikate dhe arritën të merrnin tri pikët që i lejojnë të rikthehen të vetëm në krye të renditjes.

Në të 25’ një top i gjatë nga Toli dhe një dalje e gabuar e portierit të Vllaznisë Zogovic, nxori Xhixhën të vetëm me portën e boshatisur, duke i dhënë mundësinë e shënimit të golit të avantazhit. Arbitri konfirmoi golin pas kontrollit në sistemin VAR dhe pjesa e parë u mbyll me avantazhin minimal të Tiranës.

Në të dytën Vllaznia sulmoi pak më tepër dhe mori sidomos zemër kur përmes VAR-it, Toli u ndëshkua me karton të kuq për një ndërhyrje të gabuar.

Por 10 minuta para fundit ishte Seferi i cili bëri një zbritje të bukur dhe realizoi golin e dytë për Tiranën, që vulosi fitoren e miqve.

Pa fitores minimale të Kukësit kundër Dinamos të premten, java e shtatë e Superiores mbyllet të dielën me sfidat Partizani-Egnatia dhe Teuta-Kastrioti, që luhen të dyja në 16:45.