U sanksionua nga Perëndimi/ Rusia fut në lojë sistemin që zëvendëson SWIFT: Të gjitha fondet në llogaritë bankare janë të siguruara

Rusia ka një sistem që mund të zëvendësojë sistemin global të pagesave SWIFT brenda vendit, thotë guvernatori i bankës qendrore të vendit.

Elvira Nabiullina shtoi se të gjitha bankat në Rusi do të përmbushin detyrimet e tyre dhe të gjitha fondet në llogaritë e tyre janë të siguruara.

Shtetet e Bashkuara, Bashkimi Evropian dhe Mbretëria e Bashkuar kanë rënë dakord të bllokojnë bankat e zgjedhura ruse nga sistemi SWIFT, i cili lehtëson lëvizjen e parave nëpër mijëra banka dhe institucione të tjera financiare në mbarë botën.

Monedha kombëtare ruse ra në nivel rekord, pasi G7, apo grupi i vendeve më të industrializuara, vendosi sanksione të ashpra financiare kundër Rusisë, për shkak të pushtimit të paprovokuar të Ukrainës.

Rubla ra të hënën në 114 kundrejt dollarit amerikan, krahasuar me 83.7 në fund të javës së kaluar.

Rubla ka humbur rreth 40 për qind të vlerës së saj që nga fundi i tetorit, kur Rusia ka nisur të grumbullojë trupa në kufi me Ukrainën.

Në fundjavë, G7 ka bërë të ditur se do të sanksionojë Bankën Qendrore të Rusisë dhe do t’i përjashtojë disa nga institucionet e saj më të mëdha financiare nga sistemi global bankar, i njohur si SWIFT.

Sanksionet e pengojnë aftësinë e Bankës Qendrore për të mbrojtur rublën duke i shitur rezervat e saj në monedhat e G7-ës.

Njoftimi për sanksione ka ngjallur frikë te rusët, të cilët janë parë në radhë të gjata në fundjavë, duke pritur për të tërhequr para dhe për t’i shkëmbyer rublat.

Rezervat e Rusisë kanë arritur në më shumë se 600 miliardë dollarë në shkurt.

Banka Qendrore thuhet se ka shpenzuar rreth 5 miliardë dollarë të rezervave të saj për të mbrojtur monedhën më 24 shkurt, në ditën kur Rusia ka pushtuar Ukrainën.

Për lajme në kohë reale nga lufta në Ukrainë, na përcillni në këtë blog.
Forcat ruse kanë nisur sulmet në Ukrainë me urdhër të presidentit të tyre, Vladimir Putin.

Ai ka thënë se ka autorizuar “një operacion të posaçëm ushtarak”, për të eliminuar, sipas tij, kërcënimin serioz nga Ukraina.

Qëllim i operacionit, ka thënë Putin, është çmilitarizimi i fqinjit jugor të Rusisë.

Paraprakisht, ai i ka shpallur të pavarura dy rajone separatiste në lindje të Ukrainës.

Në vitin 2014, Rusia ka aneksuar edhe Gadishullin ukrainas të Krimesë dhe ka nxitur lëvizjen separatiste në Ukrainën lindore.

Perëndimi i ka dënuar ashpër veprimet e Rusisë, duke i cilësuar si shkelje të sovranitetit dhe integritetit territorial të Ukrainës./rel