Vazhdojnë surprizat në Spanjë, pas Barcelonës dhe Realit, edhe Valencia bën blofin

Zhgënjen Valencia. Skuadra e Marcelino Garcia Torral nuk përfitoi dot nga hapi fals i Barcelonës kryesuese për ta ngushtuar në vetëm 2 pikë diferencën mes tyre në renditje, apo për të thelluar distancën me Real Madridin, që dje barazoi pa gola në fushën e Atletiko Bilbaos.

“Los Che” u mposhtën në “Coliseum Alfonso Perez” në Madrid, me rezultatin 1-0 nga Getafe në një ndeshje ku skuadra vendase luajti për 65 minuta me një lojtar më pak pas daljes me karton të kuq të Arambarrit.

Valencia pësoi kështu humbjen e parë sezonale dhe tashmë është -5 nga Barcelona dhe e sheh veten vetëm një pikë përpara Atleticos së Madridit që pozicionohet e treta.

Ndaj Getafes, Valencia vuajti disa mungesa të rëndësishme si ato të Guedes, Garay-it dhe Murillos ndërsa në pushimin mes dy pjesëve humbi edhe mesfushorin francezin Kondogbia po për shkak dëmtimi.

Në kryeqytet vendosi gjithçka goli i Bergaras në të 66-ën, goditja e të cilit u devijua nga një mbrojtës kundërshtar. Valencia goditi shtyllën me Dani Parejon, por pavarësisht përpjekjeve për të barazuar shifrat në fund doli pa pikë nga Madridi.