Vendimi për Komisionet Parlamentare/ Alfred Rushaj: Pas përpjekjeve tona u kthye ligjshmëria!

Rushaj teksa bëri me dije se ky vendim është fryt i përpjekjeve të opozitës, theksoi se deputetët e mazhorancës duhet ta kenë të qartë se nuk mund ta tjetërsojnë të drejtën e opozitës për të ngritur Komisione Hetimore dhe për të caktuar objektin e hetimit të tyre.

“Vendimi që u mor sot në Konferencën e Kryetarëve kishte të bënte me kthimin e ligjshmërisë për Komisionet Parlamentare. Pas kërkesave tona dhe përpjekjeve tona  për kthimin e ligjmërishë së Komisioneve Parlamentare u ra dakord që mbledhjet të bëhen ashtu siç e parashikon rregullorja, fizikisht, por duke respektuar të gjitha masat anti-Covid.

U ra dakord gjithashtu që tre komisionet që opozita ka paraqitur të kalojnë në seancën e datë 14 tetor për diskutim dhe miratim. U bëmë të qartë deputetëve socialistë se e drejta e opozitës për të ngritur Komisione Hetimore dhe për të caktuar objektin e hetimit është e patjetërsueshme.

Padyshim ne nuk tërhiqemi nga ajo që  kushtetuta dhe jurisprudenca e Gjykata Kushtetuese kanë vendosur në lidhje me objektin e komisioneve hetimore”, tha Rushaj.