Kryeministri i Kosovës Albin Kurti ka dhënë deklaratë me rastin e raportuar për vrasjen e një polici dhe plagosjen e një tjetri në Loznicë të Serbisë.

Ministri i Brendshëm i Serbisë Ivica Daçiç ka thënë se në vendngjarje është gjetur një pasaportë e Kosovës me emrin Artan Hajrizi. Kurti, në konferencë për mediat tha se rasti nuk ka përse të politizohet.

“Kemi pranuar edhe ne informacione, sikurse edhe ju sepse kjo vrasje ka ndodhur në Serbi, që do të thotë se burim informacioni ka qenë Serbia. Tani, organet tona kompetente, Ministra e Brendshme, e Jashtme, policia jonë do të njoftojnë opinionin, edhe juve edhe mua, për situatën aktuale.

Edhe unë jam duke pritur dhe do të pres derisa ata të japin deklaratat e tyre profesionale, sepse edhe ne mendojmë që kjo gjë nuk duhet të politizohet, por të trajtohet si e tillë edhe nga aspekti i sigurisë, edhe nga këndi profesional dhe ligjor”, u shpreh Kurti.

Serbia akuzon një shqiptar për vrasjen e një polici në kufij

Mediat në Serbi kanë raportuar se pak orë pas mesnate një krim ka ndodhur në pikën kufitare në Loznicë, ku një efektiv i policisë kufitare ka mbetur i vrarë dhe kolegu i tij është plagosur.

Nga raportimet dhe sipas ministrit të brendshëm të Serbisë Ivica Daçiç, polici Nikolla Krsmanoviç 34-vjeç ka mbetur i vdekur, ndërsa Vejkoslav Iliç 50-vjeç është plagosur dhe ndodhet në spital jashtë rrezikut për jetën.

Efektivët kishin ndaluar për kontroll një automjet tip ‘Benz’ në pikën e kontrollit Lipnički Šor. Në makinë ndodheshin dy shtetas, të cilët mendohet të kenë dalë nga makina dhe kanë qëlluar me armë policin 34-vjeçar në gjoks dhe kolegun e tij në shpatull.

Më pas janë larguar nga vendi i ngjarjes. Policët serbë janë dërguar në spitalin e Loznicës ku Krsmanoviç ka ndërruar jetë. Në vendin e ngjarjes thuhet se është gjetur një pasaportë e lëshuar nga autoritet e Kosovës me emër të Artan Hajziri, i cili mendohet të jetë dhe autori i ngjarjes.

Policia po punon për të ndaluar autorin!