143 mijë shqiptarë duhet të plotësojnë deklaratën e të ardhurave deri më 31 mars

Të paktën 143 mijë individë në Shqipëri janë të detyruar të dorëzojnë deklaratën vjetore të të ardhurave (DIVA) për vitin 2024, me afat të fundit më 31 mars. Ky detyrim përfshin çdo individ me pagë bruto mbi 1000 euro në muaj, si dhe të gjithë të dypunësuarit, pavarësisht shumës së të ardhurave që realizojnë.

Sipas Alekta Çabej, përfaqësuese e administratës tatimore, deklarata është thelbësore për çdo qytetar:
“Ashtu si bizneset që bëjnë bilancet e tyre, edhe individët duhet të dorëzojnë një bilanc të të ardhurave të veta nëpërmjet formularit DIVA, i cili gjendet në faqen zyrtare të tatimeve. Regjistrimi është i domosdoshëm dhe afati i fundit është data 31 mars.”

Çfarë përfshihet në deklaratën e të ardhurave?

Përveç pagës bruto, qytetarët duhet të raportojnë:
• Të ardhurat nga interesat e depozitave bankare ose investimet në bono thesari.
• Të ardhurat nga kontratat e shërbimit brenda dhe jashtë vendit.
• Të ardhurat nga shitja ose dhënia me qira e pasurive, përfshirë ato të listuara në platformat online si Booking dhe Airbnb.

Kjo procedurë buron nga ndryshimet në ligjin për tatimin mbi të ardhurat, ku kufiri minimal për deklarim është ulur nga 2 milionë lekë në 1.2 milionë lekë bruto në vit.

Penalitetet për mosdeklarim

Individët që nuk plotësojnë formularin DIVA do të përballen me gjoba minimale prej 3 mijë lekësh, të ndjekura nga kamatëvonesa. Numri i individëve të detyruar të deklarojnë pritet të rritet, pasi shumë qytetarë realizojnë të ardhura shtesë përtej pagës së tyre kryesore.