Kim Mehmeti: Kryeministri i Shqipërisë vepron sipas logjikës: sa më keq e ka Shqipëria, aq me mirë bëhet për mua!

Kim Mehmeti

Kryeministri i Shqipërisë vepron sipas logjikës: sa më keq e ka Shqipëria, aq me mirë bëhet për mua!

“Edhe sikur e vërteta te ishte ashtu siç thotë Kryeministri i Shqipërisë, megjithatë, atë më shumë do e shqetësonte përmbajtja e bisedave të përgjuara telefonike, se sa kush ato ua dorëzoi gazetarëve, si dhe, pas shfuqizimit te dekretit për zgjedhjet vendore nga ana e Presidentit, ai do e ndalonte fushatën parazgjedhore, duke e shmangur kështu rrezikun nga ndonjë përplasje civile. Pra, do sillej si ‘kryefamiljar’ i ndërgjegjshëm dhe përgjegjshëm, i cili nuk rrezikon ‘djegien’ e shtëpisë dhe ‘përgjakjen’ e vëllazërisë, vetëm pse atij i është rrezikuar pozita e Kryefamiljarit. Por siç duket, ai, si edhe shumë të tjerë rreth tij, veprojnë sipas logjikës: sa më keq e ka Shqipëria, aq me mirë bëhet për ne! Dhe sillen kështu sepse i dinë të këqijat që ia kanë bërë vendit e popullit, pra ngaqë i trishton e vërteta për vetveten dhe, sepse e dinë se ajo e vërtetë për ta, mund të mbulohet vetëm me ‘jorganin’ e ndonjë të keqeje më të madhe, e që popullin do e çonte ta harronte pyetjen: cilët ishin muratorët e ferrit, e që tri dekada me radhë na gënjenin se ndërtonin parajsën shqiptare!”