U zgjodh kryebashkiak por ende ndodhet pas hekurave, gazetari Mustafa Nano: Të lirohet Fredi Beleri! Mos t’i fryhet zjarrit të përçarjes me Greqinë

Gazetari Mustafa Nano ka reaguar pas rezultatit nga votimi për kryebashkiakë në Himarë, ku Fredi Beleri siguroi fitoren. Përmes një postimi në rrjetet sociale, Nano ka bërë thirrje gjykatës që të lirojnë nga burgu kryebashkiakun e zgjedhur dhe jo të zgjasë procesin që kryeministri Edi Rama të gjejë pretekst e ta shkarkojë më vonë këtë të fundit.“Ka zëra që po lusin krejt tjetër gjë, me fjalë të tjera po lusin që të dalë një gjyqtar që ta dënojë njëherë e mirë Belerin; ose ta mbajë edhe pak në pranga në mënyrë që Rama të ketë një justifikim për ta shkarkuar shpejt e shpejt kryebashkiakun e sapo zgjedhur të Himarës. E ka Rama në plan një gjë të tillë? Duhet shpresuar që jo”, thekson ai.Postimi i plotë:Duhet të dalë një gjyqtar ta ndreqë lajthimin e bërë nga prokurorët: ta nxjerrë Belerin nga burgu. Sa më shpejt, aq më mirë. E di, fjala e institucioneve do duhej të kishte gjithnjë epërsi mbi “trillet” e zgjedhësve, por të mbrosh me forcë këtë parim në Shqipëri është pesë me hiç (po shohim se edhe në SHBA mjafton mbështetja elektorale për t’i dhënë dikujt impunitet: shikoni se ç’ndodh me Trumpin). Prandaj, i nderuar gjyqtar i çështjes, preje këtë “nyje gordiane”, pa e zgjatur dhe pa iu nënshtruar histerive medemek patriotike. Patriot do jesh ti, e jo ata që gjetën arsye për t’i vënë prangat një kandidati jo qeveritar tri ditë para zgjedhjeve. Patriot do jesh ti, e jo ata që, me veprimin e tyre, u bënë shkak që Himara të binte në duart e një njeriu si Beleri. E nuk do kryesh me këtë veç një veprim patriotik. Do kryesh edhe një veprim inteligjent diplomatik. Po skrupujt profesionalë? – do thotë ndokush. Përgjigja ime është: vërtet besoni se prokurori i ka vënë prangat Belerit mbi bazën e ndërgjegjes profesionale? Unë nuk besoj.