Pasi largoi De Biasin, Alaves merr këtë rezultat të papritur në La Liga

Alaves largoi trajnerin Gianni De Biasi një javë më herët dhe emëroi në atë post ish-lojtarin e Barcelonës, Abelardo.

Ky i fundit e nisi me një rezultat tejet pozitiv aventurën në krye të klubit, pasi arriti të marrë 3 pikët në transfertën e vështirë katalanase, duke triumfuar 2-3 ndaj Gironas.

Pjesa e parë përfundoi në barazim pa gola, ndërsa në pjesën e dytë, vendasit shënuan dy gola të shpejtë dhe u duk se Alaves do të pësonte humbjen e radhës.

Por, mesfushori anësor Ibai, nuk ishte i këtij mendimi dhe arriti të shënojë 3 herë në portën e Gironës në 20 minutat e fundit, duke përmbysur rezultatin.

Ky rezultat mund të cilësohet si shumë pozitiv, nëse kujtojmë që në fushën e Gironës doli i humbur edhe Reali i Madridit, ndërsa Alaves tani është shumë pranë daljes nga zona e rënies nga La Liga.