Qeveria gjermane në krizë, kancelari Scholz shkarkon ministrin e Financave

Koalicioni qeverisës trepartiak i Gjermanisë u shemb të mërkurën në mbrëmje, pasi kancelari Olaf Scholz njoftoi se do të shkarkonte ministrin e tij të financave, Christian Lindner, për shkak të mosmarrëveshjeve të vazhdueshme rreth reformave ekonomike.

Sipas Politico, bisedimet në koalicionin e Partisë Socialdemokrate të Scholz-it, të Gjelbërve dhe Partisë Demokratike të Lirë të Lindnerit, kishin prekur fundin, pasi FDP publikoi një dokument me kërkesa për reforma ekonomike liberale që ishin të vështira për t’u pranuar nga dy partitë e tjera.

Gjatë një takimi dramatik të liderëve të tre partive të mërkurën në mbrëmje, Lindner i tha Scholz se nuk shihte asnjë mënyrë për të vazhduar koalicionin dhe i kërkoi atij që të hapte rrugën për zgjedhje të parakohshme.

Kjo solli njoftimin e Scholz-it se do ta shkarkonte, raporton POLITICO, duke iu referuar dy burimeve nga brenda diskutimeve.

FDP është partia më e vogël në koalicion dhe tani po bën votime me vetëm katër për qind – nën pragun e nevojshëm për të hyrë në parlamentin gjerman në zgjedhjet e ardhshme federale, të planifikuara për në shtator – që do të thotë se udhëheqësit e saj kanë menduar për një shkëputje të koalicionit me qëllim për të shpëtuar të ardhmen e tyre politike.