Arrestohet tutorja 19-vjeçare e dy motrave në Berat

Policia ka vënë në pranga një tutore 19-vjeçare me inicialet S.K., e cila shfrytëzonte për prostitucion 2 vajza (motra), njëra prej tyre e mitur.

Sipas policisë, dy motrat e shfrytëzuara, A.A. 19 vjeçe dhe motra 15-vjeçarja, janë proceduar penalisht në gjendje të lirë.

“Si rezultat i një hetimi me metoda proaktive, të kryer për rreth 2 muaj, nga Seksioni për Hetimin e Trafiqeve të Paligjshme dhe Narkotikëve i DVP Berat, në bashkëpunim me Prokurorinë e Beratit, u finalizua, në bashkëpunim me Drejtorinë e Forcës së Posaçme Operacionale të DPPSh-së, operacioni “Multiple”.

Gjatë operacionit, u vu në pranga shtetasja S. K., 19 vjeçe, banuese në Berat, si dhe u proceduan në gjendje të lirë shtetasja A. A., 19 vjeçe dhe motra e saj 15 vjeçe. Nga hetimet dyshohet se shtetasja S. K. shfrytëzonte për prostitucion, 2 shtetaset e tjera.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Berat, për veprime të mëtejshme”,njofton policia.