Transaksione të shumta pronash në dy vite/ Deklarimet e pasurisë së kryebashkiakut të Sarandës ngrenë pikëpyetje

Kryetari i Bashkisë së Sarandës, Oltion Çaçi, rezulton të ketë kryer një numër të lartë transaksionesh me pasuri të paluajtshme që prej marrjes së funksionit publik. Të dhënat burojnë nga deklarimet e pasurisë të dorëzuara nga vetë ai pranë Inspektorati i Lartë i Deklarimit dhe Kontrollit të Pasurive (ILDKP) për vitet 2023 dhe 2024.

Sipas dokumentacionit zyrtar, Çaçi ka shitur ose këmbyer gjithsej 13 pasuri të paluajtshme, përfshirë apartamente, njësi tregtare dhe garazhe, ku figuron bashkëpronar me kuotë 16.667% në secilën prej tyre.

Viti 2023: gjashtë apartamente “largohen” nga pronësia

Në deklarimin për vitin 2023, kryebashkiaku raporton largimin nga pronësia të 6 apartamenteve, me sipërfaqe që variojnë nga 43 deri në 95 m². Në të gjitha rastet, vlera e përfituar është deklaruar 0 lekë, me shënimin “nuk e zotëroj  tjetër”, pa sqarime shtesë mbi formën konkrete të transferimit apo shkëmbimit.

Ky fakt ngre pikëpyetje mbi mënyrën e realizimit të këtyre lëvizjeve pronësore dhe mbi çmimet reale të transaksioneve, në një treg ku pasuritë e paluajtshme—sidomos në Sarandëkanë pësuar rritje të ndjeshme vlerash.

Viti 2024: ritëm edhe më i lartë transaksionesh

Edhe gjatë vitit 2024, sipas deklarimit zyrtar, Çaçi ka vijuar me shitjen e pasurive. Këtë herë bëhet fjalë për 7 pasuri të tjera, konkretisht:

• 5 apartamente
• 1 njësi tregtare
• 1 garazh

Edhe këto pasuri janë deklaruar me kuotë pronësie 16.667%, ndërsa vlerat e raportuara si përfitime janë, në disa raste, simbolike. Për shembull:

• një njësi tregtare 70 m² është shitur për 16,753 lekë;
• një apartament 71.1 m² për 43,178 lekë;
• një tjetër apartament 63.8 m² për 38,739 lekë.

Shuma të tilla janë dukshëm larg çmimeve reale të tregut imobiliar në zonat bregdetare.

Pyetje mbi përputhshmërinë me funksionin publik

Intensiteti i lartë i këtyre transaksioneve ka sjellë që emri i Oltion Çaçit të përflitet publikisht si “Sheiku i Sarandës”, për shkak të rolit aktiv në lëvizjen e pronave, në një kohë kur ushtron një funksion të lartë publik.

Megjithëse deklarimet janë formalisht të regjistruara në ILDKP, ritmi i shitblerjeve dhe vlerat e raportuara ngrenë pikëpyetje mbi transparencën, konfliktin e mundshëm të interesit dhe përputhshmërinë e kësaj veprimtarie me detyrën e kryetarit të bashkisë.

Deri në publikimin e këtij lajmi, nuk ka një reagim zyrtar nga Oltion Çaçi lidhur me këto të dhëna dhe me mënyrën e realizimit të transaksioneve.