Trondit gazetari: SPAK po heton Edi Ramën!

Gazetari Ferdinand Dervishi ka bërë deklarata të forta në studion e emisionit “Kjo Javë”, duke hedhur dritë mbi raportet mes kryeministrit Edi Rama dhe Strukturës së Posaçme kundër Korrupsionit dhe Krimit të Organizuar, SPAK.

Sipas Dervishit, Rama ka ushtruar presion ndaj prokurorëve të posaçëm, duke kërkuar që hetimet të mos prekin elementë personalë, përfshirë edhe telefonin e tij. Gazetari u shpreh se kryeministri ka tentuar të vendosë kufij ndaj veprimtarisë së SPAK, duke sinjalizuar se ka pasur edhe forma kërcënimi, pa hyrë në detaje konkrete mbi mënyrën se si janë ushtruar ato.

Ai komentoi gjithashtu debatin publik që, sipas tij, mundohet të relativizojë hetimet ndaj figurave të larta shtetërore, me justifikimin se pushteti i dalë nga vota nuk duhet tronditur. Dervishi e cilësoi këtë qasje si të gabuar dhe në kundërshtim me parimet themelore të shtetit të së drejtës.

Sipas gazetarit, SPAK ka detyrim ligjor dhe kushtetues të hetojë çdo zyrtar, pavarësisht funksionit apo peshës politike. Ai theksoi se kryeministri nuk përbën përjashtim dhe se barazia para ligjit është thelbi i reformës në drejtësi, mbi të cilën është ngritur vetë ekzistenca e SPAK.