Dalin pamjet e arrestimit të Moisi Habilajt në Borsh (VIDEO)

Policia e Shtetit ka bërë publike momentet nga arrestimi i Moisi Habilajt, i cili u kap në një lokal në zonën e Borshit, gjatë zhvillimit të operacionit të koduar “Metodat”.

Aksioni policor u realizua nga Drejtoria Vendore e Policisë Vlorë, në bashkëpunim me Forcën e Posaçme Operacionale, pas një pune të gjatë hetimore për të gjurmuar vendndodhjen e një personi të shpallur në kërkim ndërkombëtar nga autoritetet italiane.

Gjatë ndërhyrjes, në flagrancë u arrestua edhe një 46-vjeçar nga Saranda, ndërsa një shtetas italian 70-vjeçar u procedua në gjendje të lirë, i dyshuar për përkrahje të autorit të krimit.

Sipas burimeve zyrtare, Habilaj ishte lokalizuar në një beach bar në pronësi të familjarëve të tij. Në momentin e kapjes, ai kishte ndryshuar pamjen e jashtme duke mbajtur kapele dhe mjekër, në përpjekje për të shmangur identifikimin nga autoritetet.

Operacioni konsiderohet një tjetër goditje ndaj personave në kërkim ndërkombëtar dhe strukturave kriminale që tentojnë t’i shmangen drejtësisë.