DASH thirrje Kosovës dhe Serbisë: Ulni tensionet!

Departamenti amerikan i Shtetit ka vazhduar të bëjë thirrje për Kosovën dhe Serbinë që të ndërmarrin veprime të menjëhershme për të zbutur situatën në veri të Kosovës, sipas  zëdhënësit të Departamentit të Shtetit të SHBA-së. Ky koment u dha pasi u diskutua plani pesëpikësh i kryeministrit të Kosovës, Albin Kurti, për uljen e tensioneve në veri.

Në planin e paraqitur nga Kurti, një nga pikat kryesore është sundimi i ligjit, duke përfshirë identifikimin, ndjekjen penale dhe gjykimin e anëtarëve të grupimeve kriminale që kanë sulmuar Policinë, trupat e NATO-s dhe gazetarët në veri të Kosovës.

Më 13 qershor, Policia e Kosovës zhvilloi një aksion në Mitrovicë të Veriut dhe arrestoi Millun Millenkoviq-Llune, i cili është konsideruar nga ministri i Punëve të Brendshme të Kosovës si një udhëheqës i formacionit kriminal “Mbrojtja Civile” dhe prijësi i bandave kriminale që kanë terrorizuar qytetarët e Kosovës. Sipas Departamentit të Shtetit, ata që janë përgjegjës për sulmet e dhunshme duhet të mbahen përgjegjës pas një procesi ligjor të rregullt dhe me transparencë.

Shtetet e Bashkuara dhe Bashkimi Evropian i kanë paraqitur Kurtit tre kërkesa: qetësimin e situatës në veri, organizimin e zgjedhjeve të reja në katër komunat e veriut dhe rikthimin në dialog për normalizimin e marrëdhënieve Kosovë-Serbi.

Tensionet në veri të Kosovës filluan më 26 maj, kur Policia e Kosovës ndihmoi kryetarët shqiptarë të komunave Zveçan, Zubin Potok dhe Leposaviq të vendosen në objektet komunale, pavarësisht rezistencës së banorëve lokalë. Këta kryetarë u zgjodhën më 23 prill, por votimet u bojkotuan nga partitë dhe popullata serbe lokale. Tensionet kulmuan më 29 maj, kur banorët serbë lokalë u përleshën me ushtarët e misionit të NATO-s në Kosovë (KFOR), duke rezultuar në lëndime të dhjetëra persona nga të dyja palët.