Dorëzohet Infantino, FIFA heq dorë nga ideja e tij për Kupën e Botës

FIFA ka bërë një tërheqje të pjesshme nga projekti i saj ambicioz “FIFA Forward Enterprise” (FFE), duke zbutur qëndrimin pas reagimeve të forta nga federatat dhe konfederatat ndërkombëtare, por pa e hequr përfundimisht nga tryeza këtë plan.

Nisma, e bërë publike më 28 korrik, parashikonte krijimin e një strukture komerciale me vlerë rreth 20 miliardë dollarë, ku investitorë privatë do të përfitonin një pjesë të të drejtave tregtare të Kupës së Botës dhe Kupës së Botës për Klube. Mes emrave të përmendur ishte edhe një kompani e lidhur me Joshua Kushner.

Projekti shkaktoi menjëherë përplasje të forta në botën e futbollit. UEFA reagoi ashpër dhe, bashkë me 55 federatat anëtare, shpalli bojkot të pacaktuar ndaj aktiviteteve të FIFA-s. Në këtë qëndrim u rreshtuan edhe vende të rëndësishme si Spanja dhe Portugalia, organizatore të Botërorit 2030. Kritika të forta erdhën gjithashtu nga konfederatat e Amerikës së Veriut dhe Azisë, të cilat ngritën shqetësime për mungesë transparence dhe afate të papërshtatshme vendimmarrjeje.

Tensionet u thelluan pas dorëheqjes së një prej këshilltarëve të afërt të presidentit Gianni Infantino, duke rritur presionin ndaj drejtuesve të FIFA-s për të rishikuar projektin.

Më 31 korrik, FIFA reagoi zyrtarisht, duke sqaruar se asnjë ndryshim nuk do të bëhet pa miratimin e 211 federatave anëtare. Institucioni theksoi se aktivitetet tregtare mbeten të pandryshuara dhe hodhi poshtë pretendimet se po “shitet futbolli”.

Megjithatë, pavarësisht këtij qëndrimi më të butë, plani nuk është braktisur plotësisht. Konsultimet vijojnë dhe vendimi përfundimtar pritet të merret në muajin shtator, ku federatat do të votojnë mbi të ardhmen e këtij projekti.