Do të luajë kundër Belgjikës

Një vendim i papritur nga FIFA ka ndezur debat në prag të fazës vendimtare të Kupës së Botës 2026. Federata Ndërkombëtare e Futbollit ka vendosur të pezullojë dënimin ndaj sulmuesit të SHBA-së, Folarin Balogun, i cili ishte ndëshkuar me karton të kuq në përballjen e 1/16-ave kundër Bosnjës.

Incidenti ndodhi gjatë një dueli të fortë, ku Balogun ndërhyri ndaj Muharemovic dhe u përjashtua nga fusha pas rishikimit të aksionit nga arbitri brazilian Raphael Claus. Sipas rregullores standarde, ky ndëshkim do të sillte automatikisht pezullimin për ndeshjen pasardhëse, por FIFA ka ndërhyrë duke marrë një vendim të pazakontë.

Për herë të parë në historinë e këtij kompeticioni, është aplikuar neni 27 i Kodit Disiplinor, i cili i jep të drejtë organit përkatës të pezullojë, plotësisht ose pjesërisht, zbatimin e një mase disiplinore. Kjo do të thotë se Balogun është i lirë të luajë në ndeshjen e 1/8-ave kundër Belgjikës, e planifikuar të zhvillohet në orën 02:00 (me orën shqiptare).

Vendimi ka shkaktuar reagime të menjëhershme, përfshirë edhe atë të Presidentit të SHBA-së, Donald Trump, i cili përmes një postimi publik falënderoi FIFA-n për atë që e cilësoi si “korrigjim të një padrejtësie”.

Rasti i Balogun ngjan me precedentë të mëparshëm në futbollin ndërkombëtar, ku dënimet janë zbutur përmes pezullimeve me kusht. Një shembull i njohur është ai i Cristiano Ronaldos, i cili në të kaluarën përfitoi nga një vendim i ngjashëm pas një incidenti në eliminatoret e Kupës së Botës.

Sipas dispozitave disiplinore, pezullimi i dënimit mbetet i kushtëzuar: nëse lojtari kryen një tjetër shkelje të ngjashme gjatë periudhës së provës, sanksioni fillestar rikthehet automatikisht dhe mund të shoqërohet me masa shtesë.

Folarin Balogun ka qenë një nga lojtarët më në formë të SHBA-së në këtë turne, duke regjistruar 3 gola dhe 1 asist në 4 ndeshje. Rikthimi i tij për përballjen ndaj Belgjikës pritet të ketë ndikim të rëndësishëm në ambiciet e skuadrës amerikane për të avancuar më tej në kompeticion.