Astrit Kalanë e vrau Elvis Shkambi, Uljan Bajramin e ‘vrau’ drejtësia e patronazhisteve

Rasti i avokatit Uljan Barjami dhe vrasja e gjyqtarit Astrit Kalaja ndajnë një pikë të përbashkët sallën e gjyqit. Astrit Kalaja u vra nga Elvis Shkambi, një akt që pasqyronte pasojat e zvarritjeve, korrupsionit dhe një sistemi të vjetër të drejtësisë që nuk dinte të mbronte jetën e atyre që respektojnë ligjin.

Uljani, nga ana tjetër, po goditet nga strukturat që quajnë veten “drejtësi e re” një drejtësi që të vret për së gjalli. Njëri humbi jetën, tjetri po plagoset për vdekje, fizikisht ose moralisht, në çdo rast duke paguar çmimin e ndershmërisë.

Në të dy rastet, strukturat e shtetit dështuan në misionin e tyre, njëherë duke mos mbrojtur jetën e një gjyqtari, njëherë duke sulmuar integritetin, karrierën dhe ndershmërinë e një avokati.

Uljani nuk pranoi të bëhet pjesë e lojës së pistë të pushtetit dhe korrupsionit, ashtu si Kalaja nuk pranoi të toleronte padrejtësinë. Në të dy rastet, e mira u përplas me të keqen dhe e keqja triumfoi përkohësisht mbi njerëzit që guxojnë të mbrojnë ligjin.

Të dy janë dëshmi të një realiteti të frikshëm ku drejtësia nuk është e barabartë, por përdoret si armë për të ndëshkuar të ndershmit. Kalaja u vra nga dhuna e drejtpërdrejtë, Uljani po sulmohet nga manipulimi, montazhet dhe abuzimi institucional.

Rasti i Uljanit prek çdo shqiptar që beson tek drejtësia. Ai është simbol i një zëri që nuk hesht, i një guximi që sfidon korrupsionin, dhe i një besimi se ligji duhet të mbrojë të pafuqishmit, jo të ndëshkojë të ndershmit. Ky është një apel për shoqërinë, të mos heshtë për ata që përballen me padrejtësinë, sepse sot është Uljani, nesër mund të jemi secili prej nesh.

Në fund, dhimbja dhe trishtimi që lë pas ky krahasim janë të mëdha. Por mes gjithë kësaj padrejtësie, Uljani dhe Kalaja na japin një mësim të qartë: të qenit i ndershëm dhe i drejtë mund të jetë e rrezikshme për ata që abuzojnë me pushtetin, por gjithmonë është e drejtë dhe e vlefshme për këdo që beson tek drejtësia.

Pra këta janë dy të vrarë në sallën e gjyqit, Astrit Kalaja humbi jetën nga dhuna e drejtpërdrejtë e Elvis Shkambit, ndërsa Uljan Barjami po “vritet” për së gjalli nga drejtësia e kontrolluar nga patronazhiste, një sistem që përdor ligjin si armë kundër ndershmërisë./ Av Arben Llangozi