EMRI/ Aksidenti tragjik i merr jetën të riut shqiptar në Itali

Një aksident i rëndë rrugor në Sorbolo, pranë stacionit të trenit, i mori jetën dje pasdite Francesco Ajdinit, 18-vjeçar me origjinë shqiptare, banues në Praticello di Gattatico (Reggio Emilia). Ngjarja ndodhi rreth orës 16:00 në Via Marconi, përgjatë Rrugës Provinciale 62.

Sipas policisë dhe të dhënave paraprake, Francesco po udhëtonte me një skuter 125 cc drejt Reggio-s, kur një Fiat i drejtuar nga një burrë që po kthehej majtas pranë ish-supermarketit Tigotà, e përplasi atë. Pavarësisht se i riu mbante helmetë, ai përfundoi në asfalt me plagë të rënda.

Ekipet e Ndihmës Publike të Parmës, vullnetarët e Kryqit të Kuq dhe një helikopter shpëtimi mbërritën shpejt në vendngjarje, por pavarësisht përpjekjeve për të kryer CPR, Francesco nuk mundi t’i mbijetojë plagëve.

Francesco kishte mbushur 18 vjeç më 18 gusht dhe jetonte me prindërit dhe motrën më të madhe në Gattatico. Kryetari i bashkisë së Gattatico, Daniele Finucci, që e njihte familjen personalisht, e përshkroi atë si “të ndershme dhe me parime të shëndosha” dhe shprehu ngushëllimet e tij:

“Jam thellësisht i trishtuar dhe shpreh ngushëllimet e mia në emër të gjithë bashkisë.”

Edhe punëdhënësi i babait të Francescos, Flamur Ajdini, kopshtar në kompaninë AB Global Service në Collecchio, foli për tragjedinë duke e cilësuar familjen dhe të birin si persona të mirë, duke theksuar tronditjen e madhe që ka shkaktuar aksidenti tek stafi.

Fatkeqësisht, kjo nuk është hera e parë që familja Ajdini përballet me një tragjedi të tillë. Në vitin 2004, në një tjetër aksident rrugor, humbi jetën Sara, motra dyvjeçare e Francescos.