Fermerët të falimentuar nga çmimi i grurit 50% më i lirë në treg

Na premtuan subvencione e lehtësime”- U nxit nga shteti, gruri gati për të dalë në treg mbetet stok!

Në fshatin Plug të Lushnjës, temperaturat e larta kanë tharë grurin dhe fermerët po përballojnë probleme serioze me stokun e tyre në fushë. Ata shprehin shqetësim se një dëm i vetëm nga shiu do të shkaktojë humbje të mëdha. Çmimi i grurit ka rënë me 50% këtë vit, ndërsa fermerët thonë se po pësojnë humbje ekonomike pasi nuk mund ta shesin prodhimin e tyre. Fermerët kanë shtuar sipërfaqet e kultivimit të grurit për shkak të subvencioneve nga Ministria e Bujqësisë, por ulja e çmimit ka sjellë sfida të reja. Një fermer, Met Salliu, shpreh zhgënjim për humbjet dhe planifikon të braktisë bujqësinë vitin e ardhshëm.

Fermeri thotē se nga 100 ha me të mbjella ka përfituar 500 tonë grurë. Salliu ngre shqetësimin se çmimi i shitjes është gati 50% nën kosto dhe të gjithë prodhimin e ka të hapur në arë të pashitur.

Ministria e Bujqësisë po monitoron situatën dhe po kërkon zgjidhje për të përmirësuar gjendjen e fermerëve. Sipas të dhënave të Ministrisë së Bujqësisë, në total u mbështetën me subvencione 4 mijë fermerë, me një fond prej 5 milionë USD. Ndërsa u shtuan rreth 2,500 ha me të mbjella më shumë se viti 2022. Për këtë vit, totali i të mbjellave me grurë arriti në 57,500 hektarë.