“Forbes” vë në listën e sipërmarrësve të sukseshëm dhe shqiptarin Dean Çelaj

Pjesë e listës së sipërmarrëve të suksesshëm të revistës Forbes për kategorinë “Under 30” është dhe shqiptari Dean Çelaj.

Çelaj është themeluesi i Akademi.al, një platforme mësimdhënieje falas, të cilën e vendosi në funksion të Ministrisë së Arsimit në Shqipëri gjatë periudhës së pandemisë.

Në njoftimin e dhënë nga prestigjiozja Forbes, thuhet se Çelaj nënshkroi kontrata me qeveritë e Shqipërisë, Kosovës dhe Maqedonisë së Veriut gjatë periudhës së pandemisë për shfrytëzimin e platformës së tij.

“Dean Celaj themeloi Akademi.al në vitin 2019 në një përpjekje për të përmirësuar sistemin arsimor në vendin e tij, Shqipërinë. Duke funksionuar si Khan Academy, Akademi.al publikon video mësime nga mësuesit që studentët mund t’i shikojnë falas. Kur Covid-19 goditi, Akademi.al nënshkroi kontrata me qeveritë e Shqipërisë, Kosovës dhe Maqedonisë së Veriut për t’u bërë platforma e tyre zyrtare e mësimit në distancë. Tani ka mbi 545,000 përdorues dhe 23,000 video edukative në shqip”, shkruan Çelaj.

Kujtojmë se “Forbes Under 30” është një listë e sipërmarrësve më të suksesshëm në botë nën moshën 30 vjeç . Lista njeh 600 persona me 30 individë të përzgjedhur nga 20 industri të ndryshme.