Grabitja spektatolare

Skena që duken si të dalë nga një film aksion janë regjistruar në qytetin Milton Keynes në Angli, ku disa hajdutë të maskuar kanë vjedhur një bankomat duke përdorur një eskavator.

Ngjarja ndodhi në orët e para të mëngjesit të së dielës, ndërsa banorët e tronditur filmuan momentin kur eskavatori shkatërron murin e një supermarketi, nxjerr bankomatin dhe e tërheq zvarrë në mes të rrugës.

Pas disa sekondash “operacion perfekt”, hajdutët të veshur me kapuçë e doreza ngarkojnë bankomatin në një kamion dhe zhduken me shpejtësi nga vendngjarja.
Sipas policisë, bankomati u gjet më vonë i braktisur, ndërsa autorët janë ende në kërkim.

Policia lokale ka hapur hetimet dhe u ka bërë thirrje dëshmitarëve që të ndihmojnë me informacion, por banorët në rrjetet sociale kanë shpërthyer në ironi:

“Në Angli nuk marrin më hua, marrin drejtpërdrejt bankën!”,
– shkroi një komentues në X (ish-Twitter).

Të tjerë vunë në dukje “profesionalizmin” e grabitësve, ndërsa kujtuan se shumica e bankomateve moderne janë të pajisura me sisteme sigurie që spërkasin me bojë paratë, duke i bërë të papërdorshme për hajdutët.

Një vjedhje spektakolare, që siç thonë vetë britanikët, “mund të ishte xhiruar drejtpërdrejt për Netflix”.