Shkeljet mjedisore në Dhërmi, pezullohet aktiviteti i kompanisë

Inspektorati Kombëtar i Mbrojtjes së Territorit (IKMT) ka vendosur një masë administrative prej 1 milion lekësh ndaj kompanisë “Gjikuria”, pas konstatimit të shkeljeve gjatë një inspektimi të kryer në zonën e Dhërmiut.

Sipas njoftimit zyrtar, gjatë kontrollit në terren u identifikua një vend depozitimi i mbetjeve inerte dhe dherave të nxjerra nga gërmimet, i vendosur në pjesën e sipërme të fshatit.

Verifikimet treguan se aktiviteti ishte ushtruar pa qenë kompania e pajisur me Leje Mjedisi të tipit B, sipas kërkesave të përcaktuara në shtojcën 5.2 të legjislacionit përkatës.

Përveç gjobës financiare, autoritetet kanë vendosur edhe pezullimin e menjëhershëm të aktivitetit të kompanisë, deri në përmbushjen e detyrimeve ligjore dhe pajisjen me lejen e nevojshme mjedisore.

Ndërkohë, “Gjikuria” është ngarkuar edhe me detyrimin për të rehabilituar zonën e prekur nga depozitimi i mbetjeve, brenda një afati të arsyeshëm, me qëllim rikthimin e saj në gjendjen e mëparshme dhe minimizimin e ndikimit në mjedis.

Ky rast vjen në kuadër të intensifikimit të kontrolleve për mbrojtjen e territorit dhe respektimin e standardeve mjedisore në zonat turistike të vendit.