Ish-çiklisti i njohur gjerman, Jan Ullrich, është arrestuar nga autoritetet spanjolle

Ai  ka sulmuar fqinjin e tij, aktorin dhe regjisorin Til Schweiger.

Sipas mediave gjermane, Ullrich e kishte kaluar gardhin e banesës së Schweiger, derisa ky i fundit po festonte me miqtë shfaqjen në kinema të filmit të tij më të fundit “Honey in the Head”, festë në të cilën Ullrich nuk ishte i ftuar.

E përditshmja “Bild” bën të ditur se vet Ullrich e ka pranuar agresionin e kryer prej tij, transmeton TCH.

“Isha në rajonin e policisë për pesë orë dhe mund të konfirmoj që ndodhi një incident me fqinjin tim Til. Nuk i imagjinoja kështu pushimet e mia”, është shprehur 44-vjeçari.

Gjermanit i ishte ndaluar t’i afrohej banesës së regjisorit, duke parë sjelljen e çuditshme të tij që ishte vënë re edhe nga një dëshmitar okular.

Nuk është hera e parë që ai ka probleme me ligjin. Në vitin 2014 u përplas me një makinë duke lënduar dy persona, me ç’rast u dënua me 21 muaj në lirim me kusht dhe 10.000 franga gjobë për drejtim mjeti në gjendje të dehur.

Ullrich, i cili jeton në Mallorca nga viti 2016, është fitues i “Tour de France”’ (1997).