Ish-ministrja franceze shprehet kundër hapjes se negociatave me Shqipërinë

Në vigjilje të zgjedhjeve europiane, nga partia e presidentit Macron në Francë, vjen sërish kundërshtimi për zgjerimin e unionit. Ish-ministrja franceze e Çështjeve Europiane Natali Luazo është shprehur kundër çeljes së negociatave me Shqipërinë dhe Maqedoninë e Veriut për rrjetin francez RTL.

“Ne vijojmë të jemi kundër. Ata janë gjeografikisht në Europë dhe duhet t’i ndihmojmë, por jemi kundër zgjerimit”, tha ajo.

Loiseau kryeson listën e partisë së presidentit Macron “En Marche” në zgjedhjet për parlamentin europian që zhvillohen nga 23 deri në 29 maj. Më herët partia opozitare republikane e ish- presidentit Sarkozy kishte sulmuar En Marche duke thënë se ata tani do hapin negociatat me dy vendet ballkanike duke ndryshuar qëndrimin francez. Edhe vitin e kaluar Franca kundërshtoi me forcë çdo vendim që shkonte në drejtim të zgjerimit të BE. Kjo ishte në përputhje me planin për Europën që paraqiti Macron, në thelb të të cilit thuhej se nuk mund të kishte zgjerim të mëtejshëm të Unionit pa pasur fillimisht një konsolidim të tij të brendshëm.