Kancelari gjerman me ton të ashpër: Është detyra jonë e mallkuar të parandalojmë një luftë në Evropë

Putin: Rusia nuk dëshiron luftë

Presidenti Putin u pyet nëse ai mund ta përjashtojë mundësinë e luftës në Evropë. Ai iu referua komenteve të mëparshme të kancelarit Scholz se brezi i tij nuk mund ta imagjinojë luftën në Evropë, por theksoi se kontinenti ka parë luftë në Jugosllavi në vitet 1990, për të cilën u shpreh se “ishte iniciuar nga NATO”.

Putin thotë se Rusia nuk dëshiron luftë dhe kështu ka paraqitur propozime për fillimin e një procesi negocimi – por ai thotë se nuk ka pasur asnjë përgjigje konstruktive ndaj propozimeve të Rusisë.

Megjithatë, Putin shton se ka ende çështje të paraqitura nga NATO dhe SHBA, të cilat mund të diskutohen, raporton BBC.

Scholz: Ne duhet të jemi të guximshëm dhe të përgjegjshëm

Kancelari gjerman Scholz tha se dëshiron që Vladimir Putin t’i dërgojë negociatorët e tij me një “mandat pozitiv në mënyrë që të arrijmë përparim ne negociatat diplomatike”.

Kancelari shton se “siguria mund të arrihet vetëm me Rusinë, jo kundër Rusisë”, raporton BBC.

Scholz thotë se NATO dhe Europa janë të bashkuar në mendimin se duhet gjetur një zgjidhje, sado e vështirë. “Të gjithë duhet të jemi të guximshëm dhe të përgjegjshëm në veprimet tona”, thotë ai.

Scholz shton se “lufta është bërë e paimagjinueshme në Evropë dhe ne duhet të sigurohemi që ajo të mbetet e tillë”.

“Nuk mund ta them dot ndryshe se sa të shqetësuar jemi” tha Scholz.

“Është urgjente të kemi një de-përshkallëzimin në mënyrë që të mos kemi një luftë në Evropë”, duke shtuar se “opsionet diplomatike janë ende ne tryeze”.

Scholz tha se Putin dhe ai ranë dakord se formati i Normandisë ishte i rëndësishëm për zgjidhjen e konfliktit ukrainas. “Unë nuk do të thoja se kjo është humbje,” tha ai.

“Është detyra jonë e mallkuar të parandalojmë një luftë në Evropë”, tha Scholz.

“Për ne gjermanët, por edhe për të gjithë evropianët, është e rëndësishme që siguria e qëndrueshme nuk mund të arrihet kundër Rusisë, por vetëm me Rusinë”, tha kancelari gjerman.

***

Frika për luftë/ Mbaron takimi kokë më kokë, ja deklaratat e presidentit Putin dhe kancelarit Scholz në konferencën për mediat

Sipas BBC, presidenti rus Vladimir Putin ka nisur i pari konferencën duke thënë se Gjermania është një “partner kyç i Rusisë”.

Putin ka theksuar gjithashtu se ai do të donte të forconte marrëdhëniet mes dy shteteve.

Duke folur për shqetësimet ruse për sigurinë, Putin tha se kërkesat themelore nuk janë përmbushur nga NATO dhe se aleanca ushtarake sipas tij “ka detyrimin të mos forcojë sigurinë e saj në kurriz të vendeve të tjera”.

Megjithatë, Putin pranoi se është i përgatitur të diskutojë çështjet e sigurisë evropiane dhe të raketave ruse.

Siç raporton BBC, në fjalën e tij Presidenti Putin theksoi sektorin e energjisë si një fushë kyçe të bashkëpunimit me Gjermaninë, duke përmendur gazsjellësin Nord Stream 2 midis dy vendeve, i cili është gati, por ende nuk funksionon.

Putin ka deklaruar se ky është një “projekt thjesht tregtar” pa përfshirë politikë në të dhe se Rusia është e lumtur të vazhdojë furnizimin me gaz përmes Ukrainës nëse ka kërkesë për këtë, duke shtuar se kjo ka rëndësi ekonomike.

Ndërkohë kancelari gjerman Olaf Scholz tha se grumbullimi i trupave në kufirin me Ukrainën shihet si një kërcënim dhe është “i pakuptueshëm”.

Ai kërkon “de-përshkallëzimin” në rajon dhe thotë se është e rëndësishme që “nuk do të pasojë asnjë luftë”.

Scholz thotë se integriteti territorial është “i panegociueshëm” dhe është dëshira e tij që të ketë dialog. Bisedimet nuk duhet të kalojnë në një “nrugë qorre”, shtoi Scholz.

Takimi i tyre vjen në një kohë që inteligjenca amerikane dhe CIA kanë paralajmëruar se një pushtim i mundshëm i Rusisë në Ukrainë do ndodhë në 16 shkurt.

Mëngjesin e së martës, ministria e Mbrojtjes ruse lajmëroi se disa trupa të saj ushtarake po tërhiqeshin nga kufiri ukrainas, pa dhënë specifikime.

Megjithatë, Perëndimi duket se nuk i beson kësaj lëvizje si shenjë depërshkallëzimi.

Shefi i NATO-s u tregua skeptik për këtë, por edhe kryeministri britanik Boris Johnson ka thënë se shërbimet inteligjente tregojnë se Rusia ende po bën plane për të pushtuar Ukrainën, megjithëse Moska eshte treguar ‘e hapur’ për bisedime diplomatike.