Kthesa historike, Siria rihap ambasadën në Uashington

Qeveria amerikane ka miratuar rihapjen e ambasadës siriane në Uashington, një vendim që shënon një kthesë të fortë në marrëdhëniet mes dy vendeve pas më shumë se një dekade izolimi diplomatik.

Vendimi u njoftua pas takimit të presidentit të përkohshëm të Sirisë, Ahmed al-Sarrah, me ish-presidentin amerikan Donald Trump në Shtëpinë e Bardhë.

“Shtetet e Bashkuara po i lejojnë Sirisë të rifillojë aktivitetet e ambasadës së saj në Uashington me qëllim forcimin e bashkëpunimit në fushën e sigurisë, luftës kundër terrorizmit dhe ekonomisë,” deklaroi një zyrtar i administratës Trump, duke folur në kushte anonimiteti.

Ky zhvillim vjen paralelisht me vendimin që Siria t’i bashkohet zyrtarisht koalicionit ndërkombëtar anti-xhihadist të udhëhequr nga SHBA-të në luftën kundër grupit terrorist Shteti Islamik (ISIS).

“Siria do të jetë anëtari i 90-të i koalicionit kundër ISIS-it dhe do të bashkëpunojë me SHBA-në për të eliminuar qelizat e fundit të ISIS-it dhe për të ndalur fluksin e luftëtarëve të huaj,” – tha një tjetër zyrtar amerikan.

Nga ana tjetër, ministri i Informacionit i qeverisë de facto të Sirisë, Hamza al-Mustafa, konfirmoi lajmin në rrjetin X, duke theksuar se marrëveshja është aktualisht politike dhe pa elementë ushtarakë.

“Marrëveshja është politike dhe deri më tani nuk ka aspekte ushtarake,” – sqaroi ai.

Vendimi shihet si një përpjekje për rindërtimin e kanaleve të komunikimit midis Uashingtonit dhe Damaskut, pas një periudhe të gjatë përjashtimi ndërkombëtar të Sirisë për shkak të luftës civile dhe shkeljeve të të drejtave të njeriut.