Kuvendi i heq mandatin e deputetit Arben Ahmetajt

Kuvendi i Shqipërisë i ka hequr mandatin e deputetit ish-zv.kryeministrit Arben Ahmetaj.

Arben Ahmetaj e ka humbur mandatin e deputetit. Lajmi është konfirmuar nga Kuvendi.

Kuvendi thotë se sipas ligjit, deputetët që nuk paraqiten në seancë në gjashtë muajit e fundit, e humbin mandatin, në këto kushte, Kuvendi njofton Komisionin Qendror të Zgjedhjeve për vendin vakant.

Kujtojmë se ish-zëvendës kryeministri ndodhet në arrati prej 6 muajsh.

Ndaj tij janë ngritur tre akuza penale nga SPAK, korrupsion pasiv, pastrim parash dhe deklarim i rremë dhe fshehje pasurie.

Për këto akuza është kërkuar dhe arrestimi i tij.

Ahmetaj vijonte të ishte deputet, por pas 6 muajve mungesë, Kushtetuta detyron ndërprerjen e mandatit.

Kështu, 6 janari ishte dita kur mbushën ekzaktësisht 6 muaj nga mungesa e Ahmetajt në Kuvend, çka solli automatikisht humbjen e mandatit.

Sipas renditjes së kandidatëve të PS-së për Qarkun Tiranë, mandatin e Ahmetaj do duhet ta marrë Dallëndyshe Bici, e cila nga vota preferenciale fitoi 4977 vota dhe u rendit e 21-ta në listën e kandidatëve të PS për Tiranën.

Kujtojmë se mbi Arben Ahmetajn rëndojnë akuzat për korrupsion, pastrim parash dhe fshehje pasurie, në lidhje me skandalin e inceneratorëve. Më 20 korrik, SPAK lëshoi urdhër arresti për të, ndërsa disa ditë më vonë u shpall në kërkim ndërkombëtar.