Lista e zezë/ SHBA heq sanksionet ndaj kompanive të manjatit rus, aleatit të Putin

Administrata e presidentit amerikan, Donald Trump ka hequr sanksionet në tri kompani të lidhura me manjatin rus, Oleg Derispaska, i cili njihet si aleat i presidentit rus, Vladimir Putin.

Heqja e masave ndaj gjigantit Rusal më pas kompanive, En+ and EuroSibEnergo ka ndodhur pasi Deripaska është larguar nga pozitat që ka pasur në këto ndërmarrje.

Manjati është i lidhur me hetimet që janë duke u zhvilluar në Shtetet e Bashkuara për ndërhyrjen e mundshme ruse në zgjedhjet presidenciale të vitit 2016 në SHBA.

Demokratët kanë kërkuar që të vazhdojë sanksionimi i kompanive, mirëpo Departamenti amerikan i Thesarit ka thënë se sanksionet ndaj manjatit rus do të vazhdojnë të aplikohen.

Këto kompani janë futur në listën e zezë të SHBA-së në prill të vitit të kaluar, meqë administrata Trump pati shënjestruar njerëz dhe biznese që është thënë të kenë përfituar nga shteti i Rusisë dhe kanë qenë të lidhura me kryerjen e “aktiviteteve të dëmshme” në gjithë botën.

Aty janë përfshirë supozimet për ndërhyrje në zgjedhjet në SHBA si dhe sulmet kibernetike ndërkombëtare. REL