‘Lulëzon’ tregu i zi i armëve në Shqipëri, alarm për trafikimin nga Kosova

Rritja e fuqisë së grupeve kriminale po reflektohet gjithnjë e më shumë edhe në arsenalin e armëve që ato posedojnë, ndërsa autoritetet flasin për një trend shqetësues në rritje të trafikut dhe qarkullimit të armëve të zjarrit në vend.

Sipas të dhënave të publikuara nga Policia e Shtetit, vetëm gjatë dy muajve të parë të këtij viti janë sekuestruar 83 armë zjarri, ku pjesa më e madhe rezulton të jenë pistoleta. Hetimet paraprake tregojnë se një pjesë e tyre dyshohet të jenë futur në Shqipëri nga Kosova përmes linjave të trafikut ilegal.

Gjatë javës së parë të shkurtit, strukturat e policisë në Tiranë ndërmorën dy operacione të veçanta kundër trafikut të armëve. Në këto aksione u sekuestruan 17 pistoleta dhe 3 armë automatike, të cilat dyshohet se kishin hyrë nga Kosova me synim shitjen në tregun e paligjshëm në kryeqytet. Autoritetet e konsiderojnë këtë si një tregues se trafiku i armëve nga Kosova drejt Shqipërisë po funksionon tashmë si një linjë e konsoliduar kriminale.

Pas ekspertizës së armëve të sekuestruara, u konstatua se pistoletat ishin imitime të markës së njohur Glock. Ky fakt ka shtyrë grupet hetimore të intensifikojnë bashkëpunimin dhe shkëmbimin e informacionit me autoritetet kosovare për të identifikuar vendin e prodhimit dhe rrjetet që qëndrojnë pas shpërndarjes së tyre.

Statistikat e policisë tregojnë se vetëm gjatë këtij viti janë arrestuar rreth 90 persona të kapur duke mbajtur, transportuar apo magazinuar armë pa leje. Ndërkohë, gjatë vitit të kaluar u sekuestruan 690 armë zjarri të kalibrave dhe llojeve të ndryshme, ndërsa 780 persona përfunduan në pranga nën akuzën e armëmbajtjes pa leje.

Autoritetet e rendit paralajmërojnë se operacionet kundër trafikut të armëve do të vijojnë, duke e konsideruar këtë fenomen si një nga faktorët kryesorë që ushqen aktivitetin e grupeve kriminale dhe rrit rrezikun për sigurinë publike.