“Është punë e djallit!”

Një video e pazakontë, e filmuar disa vite më parë në Itali, është rikthyer sërish në qendër të vëmendjes në rrjetet sociale. Pamjet tregojnë momentin kur një murgeshë ndërpret papritur një fotosesion në rrugë, duke ndarë me forcë dy modele që po përgatiteshin të putheshin para aparatit fotografik.

Ngjarja ka ndodhur në lagjen e famshme Quartieri Spagnoli në Napoli, një zonë e njohur për rrugicat e ngushta dhe atmosferën karakteristike të qytetit. Edhe pse episodi është regjistruar disa vite më parë, videoja është shpërndarë sërish në internet dhe ka ringjallur debatet dhe reagimet e shumta të përdoruesve.

Në pamje shfaqen dy aktoret dhe modelet Serena De Ferrari dhe Kyshan Wilson, të cilat po realizonin një set fotografik për revistën italiane të artit dhe stilit të jetesës “Not Yet Magazine”. Sipas konceptit të fotosesionit, ato duhej të pozonin duke u puthur përpara kamerës.

Ndërsa përgatiteshin për momentin e fotografisë, një murgeshë që po kalonte rastësisht në rrugicë u afrua me nxitim dhe ndërhyri mes tyre, duke i ndarë. E dukshëm e shqetësuar nga ajo që po ndodhte, ajo iu drejtua vajzave me fjalë të forta.

“Çfarë po bëni? Kjo është punë e djallit!”, dëgjohet të thotë murgesha në video, ndërsa bën shenjën e kryqit dhe thërret: “Jezus, Jozef dhe Mari”.

Sipas anëtarëve të ekipit të xhirimit, murgesha kishte ndaluar fillimisht për t’i pyetur nëse kishin marrë pjesë në meshën e mëngjesit. Pas kësaj, ajo kishte nisur t’i qortonte për atë që po realizonin në rrugë. Kur pa dy modelet duke u përgatitur për puthjen para kamerës, reagimi i saj ishte i menjëhershëm dhe ndërhyrja ndodhi pikërisht në mes të fotosesionit.

E gjithë situata u regjistrua nga një pjesëtare e stafit që po dokumentonte prapaskenat e fotosesionit. Më vonë, pamjet u publikuan në rrjetet sociale nga vetë modelet dhe u përhapën me shpejtësi, duke u bërë virale.

Në video, pas ndërhyrjes së papritur, Serena De Ferrari dhe Kyshan Wilson reagojnë me të qeshura, të habitura nga situata e pazakontë që ndodhi gjatë xhirimit.

Megjithëse ngjarja është e vjetër, videoja ka filluar të qarkullojë sërish masivisht në internet ditët e fundit, duke rikthyer interesin e publikut dhe duke nxitur një valë të re komentesh e reagimesh nga përdoruesit e rrjeteve sociale.