gjyqtari rrëzon kërkesën për mbylljen e çështjes dhe urdhëron hetime të tjera

Ish-kreu i SPAK-ut, Altin Dumani, është paditur në Itali nga kompania “Meral shpk”, në pronësi të familjes Cela, e cila e akuzon për shpifje dhe kallëzim të rremë. Çështja lidhet me një operacion të zhvilluar në korrik të vitit 2025, kur autoritetet italiane, mbi bazën e informacionit të përcjellë nga SPAK, sekuestruan pasuri me vlerë rreth 4 milionë euro në Verona, nën dyshimin se ishin krijuar nga të ardhura të trafikut të kokainës.

Sipas medias italiane, vetëm një muaj pas sekuestrimit, gjykata italiane vendosi heqjen e masës së sekuestros dhe kthimin e pasurive te pronarët. Në vendim thuhej se dokumentacioni i paraqitur nga kompania provonte origjinën e ligjshme të investimeve, ndërsa anëtarët e familjes Cela rezultonin pa precedentë penalë.

Pas këtij zhvillimi, kompania “Meral shpk” depozitoi padi ndaj Altin Dumanit, duke pretenduar se informacioni i dërguar nga SPAK u ka shkaktuar dëme të konsiderueshme financiare dhe cenim të reputacionit.

Prokuroria e Veronës kërkoi pushimin e çështjes, por gjyqtari Enrico Zuccon e rrëzoi këtë kërkesë. Ai urdhëroi zhvillimin e hetimeve shtesë për të verifikuar dokumentacionin e dërguar nga autoritetet shqiptare, si dhe për të sqaruar nëse SPAK kishte informuar autoritetet italiane për vendime të mëparshme që mund të binin në kundërshtim me akuzat e paraqitura.

Nga ana tjetër, mbrojtja e Altin Dumanit kërkoi gjithashtu pushimin e procedimit, duke argumentuar se padia synon të pengojë hetimet që ai ka zhvilluar ndaj grupeve të krimit të organizuar.

Në përfundim, gjykata italiane nuk pranoi as kërkesën e Prokurorisë së Veronës dhe as atë të mbrojtjes së Altin Dumanit. Me vendimin e gjyqtarit Enrico Zuccon, Prokurorisë i janë lënë edhe dy muaj kohë për të kryer verifikime shtesë mbi dokumentacionin e ardhur nga autoritetet shqiptare. Pas përfundimit të këtyre hetimeve, do të vendoset nëse procedimi penal ndaj ish-kreut të SPAK-ut do të vijojë apo do të pushohet.