Paralajmërimi: Reforma në drejtësi do u hajë kokën 140 deputetëve

Deputeti i Partisë Demokratike, Arjan Ndoja, analizoi efektet e reformës në drejtësi, duke theksuar se ajo që dikur u miratua me 140 vota unanime sot po kthehet në një sfidë për vetë klasën politike shqiptare.

“Të majtë e të djathtë, 140 deputetët e asaj kohe i kanë bërë gropën vetes. Disa prej tyre madje e kanë ndjerë tashmë këtë në burg,” deklaroi Ndoja, duke shtuar se reforma nuk ka përmirësuar efikasitetin e drejtësisë, por është përdorur për të vendosur kontroll politik mbi institucionet.

Deputeti argumentoi se SPAK përbën vetëm 1.39% të çështjeve penale në vend, ndërsa pjesa tjetër e sistemit gjyqësor merret me mbi 98% të volumeve, duke treguar se pavarësia e institucioneve nuk është forcuar, por ka pësuar rënie të dukshme.

Ai shtoi se ndryshimet në Këshillin e Lartë të Drejtësisë, nga raporti 9 me 6 në 6 me 5, kanë dhënë më shumë pushtet kryetarit, i cili mund të shtyjë, prishë apo bllokojë mbledhje, duke ndikuar drejtpërdrejt në proceset gjyqësore.

Ndoja solli në vëmendje edhe ndryshimin e rregullores së Kuvendit që krijoi komisionin për nismat qytetare dhe kontrollin postlegjislativ, të drejtuar nga Fatmir Xhafaj, të cilin e cilësoi si “një nga baballarët e reformës në drejtësi”.

“Si ka mundësi që pas 10 vitesh nga miratimi, ata që e projektuan reformën po e kontrollojnë sërish? Kjo tregon dështimin e saj si projekt i pavarësisë së drejtësisë”, përfundoi Ndoja në A2 CNN.