Qytetarët i vendosën ‘flakën’ Sofjes, dorëzohet qeveria e Bullgarisë

Qeveria bullgare të martën tërhoqi projektbuxhetin për vitin 2026, të parin e hartuar në euro përpara miratimit zyrtar të monedhës së përbashkët nga vendi më 1 janar, pas protestave të gjera në mbarë vendin kundër rritjes së planifikuar të taksave për të mbuluar shpenzime më të larta publike.

Kabineti i kryeministrit Rosen Zhelyazkov i kërkoi parlamentit të tërhiqte projektbuxhetin, duke njoftuar përmes një deklarate se pas vendimit, “qeveria do të nisë një procedurë të re buxhetore”. Projektbuxheti ishte miratuar në lexim të parë nga një komision parlamentar më 18 nëntor.

Të hënën në mbrëmje, mijëra qytetarë dolën në protestë në Sofje dhe në disa qytete të tjera, duke kundërshtuar rritjen e kontributeve të sigurimeve shoqërore dhe tatimit mbi dividentët, masa të cilat qeveria i kishte propozuar për të financuar shpenzime shtesë. Opozita dhe organizata të ndryshme akuzuan gjithashtu qeverinë për korrupsion dhe keqmenaxhim.

Sipas Mario Bikaraskit, analist i lartë për Evropën në kompaninë britanike të inteligjencës së riskut Verisk Maplecroft, procesi i rishikimit të buxhetit “do të jetë i vështirë, me mbikëqyrje të shtuar nga sindikatat, grupet e biznesit dhe publiku”. Ai shtoi se, edhe pse ekziston konsensus për kujdes fiskal, “përpjekjet e përsëritura për rritjen e taksave ka të ngjarë të nxisin tensione të tjera sociale”.

Rreth gjysma e bullgarëve kundërshtojnë adoptimin e euros, nga frika se do të cënohet sovraniteti kombëtar dhe se kalimi nga leva në euro mund të përdoret nga tregtarët për të rritur çmimet.

Qeveria kishte premtuar javën e kaluar se do ta riparaqiste planin e shpenzimeve për 2026-n pas protestave të mëparshme, duke thënë se duhej më shumë kohë për konsultime me opozitën, sindikatat dhe punëdhënësit.

Ndërkohë, zëvendësministri i Punës dhe Politikës Sociale, Ivan Krastev, paralajmëroi se mungesa e një buxheti të ri mund të ndikojë drejtpërdrejt në pagesat për qytetarët që jetojnë nën pragun e varfërisë. “Shpresoj që të gjendet arsyeja e shëndoshë dhe vullneti politik nga të gjithë pjesëmarrësit në proces që të mbrohen grupet më të cenueshme të shoqërisë sonë,” tha ai, sipas agjencisë bullgare të lajmeve BTA.