Rama fjalim para deputetëve: Mandati i katërt është barrë historike, jo thjesht fitore numerike

Kryeministri Edi Rama e ka cilësuar mandatin e katërt qeverisës të Partisë Socialiste si një “barrë historike”, duke theksuar se nuk bëhet fjalë për një mandat të zakonshëm, por për një amanet që kërkon përkushtim maksimal dhe përgjegjësi të thellë.

Duke theksuar objektivin madhor të anëtarësimit të Shqipërisë në Bashkimin Evropian deri në vitin 2030, Rama e cilësoi këtë mandat si “provën më të madhe të karakterit dhe të atdhedashurisë” për të gjithë anëtarët e shumicës parlamentare. Ai bëri thirrje për përkushtim, urtësi dhe ndjenjë solidariteti brenda skuadrës socialiste.

“Mandati i katërt që sapo kemi marrë është një histori më vete. Nëse në familjen tonë të madhe fitorja matet me numrin e mandateve që morëm, për ne, mandati i katërt duhet të matet me barrën e stërmadhe të një përgjegjësie historike që populli e hodhi mbi supet tona me peshën e plot 83 mandate. Janë 83 gurë në kurriz.

Ky nuk është një mandat i radhës, por një amanet që vjen nga shumë larg dhe që ne patëm fatin të ndodhemi në kohën dhe vendin e duhur dhe kemi privilegjin të na jepet mundësia ta çojmë në vend, duke i kthyer 4 vitet që vijnë në provën më të madhe të karakterit dhe të atdhedashurisë, për ta ngjitur Shqipërinë 2030 në majën ku qëndron shtëpia e BE. Të gjithë ne këtu jemi të parët që duhet tja nxjerrim deri në fund të gjithë kuptimin e kësaj prove zjarri dhe tja caktojmë vetes si individë, pastaj si skuadër peshat që duhet të mbajmë medoemos atë të karakterit dhe të atdhedashurisë, për ta udhëhequr të gjithë armatën e kësaj beteje për historinë. Duke  bërë punën tonë me krenari, me urtësi dhe përkushtim. Të gjitha këto duke i mishëruar me një ndjenje kuptimplotë solidariteti mes nesh”, tha Rama.

Në mesazhin e tij, Rama iu drejtua edhe atyre deputetëve që nuk do të rikthehen në Kuvend pas zgjedhjeve, duke i nxitur të shohin situatën si një mundësi të re për rritje profesionale dhe kontribut politik në forma të tjera.

“Dua tu them atyre që në shtator nuk do kthehen në Parlament që unë ua mirëkuptoj mërzinë për garën individuale. Nuk ka garë individuale që mund ta humbasësh pa u mërzitur, edhe kur luan me fëmijët me top ke një moment mërzie nëse kupton që ti nuk je më ai i pari dhe ata nuk janë më të vegjël dhe ti u munde.  Por i siguroj se nëse do ta shohin humbjen e vendit të punës si një mundësi të re personale dhe profesione në një tjetër vend pune po në shërbim të të njëjta qëllimeve të përbashkëta, si fitu4es të mandatit historik të 11 majit, jo vetëm do jenë të dobishëm, por do ta pasurojnë karrierën e tyre politike dhe profesionale dhe nëse do të duan të rikthehen në Kuvend të mund të garojnë përsëri në të ardhmen”, tha Rama.

Gjatë fjalës së tij, Rama tha se fitorja ishte rezultat i një pune të ndjekur sipas planit hap pas hapi dhe që ka nisur që prej fitores në zgjedhjet e mëparshme.

Ai nuk kurseu as ironinë për Partinë Demokratike që ka deklaruar se nuk do të njohë rezultatin e zgjedhjeve, duke thënë se ata kanë ndërtuar një “univers paralel”, ku besojnë se zgjedhjet u vodhën përmes parave, krimit dhe bandave.

“Sa më mirë ka qenë Partia Socialiste, aq më mirë ka qenë Shqipëria. Dhe sa më jo mirë ka qenë Partia, aq më jo mirë ka qenë Shqipëria. Të tjerët nuk duan ta pranojnë, ata mendojnë se zgjedhjet i fitojnë ata, dhe ne i vjedhim gjithnjë e më shumë. Sa më i madh bëhet hendeku i votave, aq më i madh bëhet hendeku i universit të tyre paralel.

Këto ditë, universi i tyre është mbushur me thasë, zarfa me lekë, trena bullgarë që xhirojnë vargmalet e Shqipërisë. Dhjetra deputetë e deputete të rinj e të reja këtu që kanë dalë nga shpellat e krimit, përmes terrorit elektoral… E vërteta është që ne nuk kemi asnjë zhgënjim këtu. Ne morëm thjesht frutet e një pune të gjatë, dërmuese, të programuar me një kalendar qysh pas fitores së zgjedhjeve të mëparshme”, tha ndër të tjera Rama.