Pa garë dhe me negocim të drejtpërdrejtë me Klodian Zoton

Tenderi me vlerën më të lartë në rang lokal për vitin 2025 është dhënë nga kryetarja e Bashkisë së Durrësit, Emiriana Sako, për pastrimin e mbetjeve urbane. Kontrata kap vlerën mbi 6 miliardë lekë pa TVSH dhe i është akorduar Klodian Zoto, përmes kompanisë Integrated Energy BV SPV.

Sipas dokumenteve zyrtare, procedura është zhvilluar me negocim të drejtpërdrejtë dhe pa konkurrencë, një praktikë që ngre pikëpyetje serioze mbi transparencën dhe ligjshmërinë e procesit. Tenderi është shpallur më 29 shtator 2025 dhe është mbyllur më 3 tetor 2025, duke lënë vetëm 4 ditë për një kontratë me vlerë miliardëshe—afat i pazakontë për prokurime të kësaj magnitude.

Kompania përfituese është e lidhur me aferën e inceneratorëve dhe administron inceneratorin e Tiranës, projekt që ndodhet në sekuestro dhe nën hetim nga SPAK për dyshime korrupsioni dhe pastrim parash. Pavarësisht kësaj, kompania ka vijuar të përfitojë fonde publike në shkallë të gjerë.

Pagesa rekord në vitin 2024

Të dhënat nga Drejtoria e Thesarit dhe Open Data Albania tregojnë se vetëm gjatë vitit 2024, Integrated Energy BV SPV ka përfituar mbi 15 miliardë lekë pagesa nga buxheti i shtetit, rreth 21% më shumë se plani fillestar buxhetor.

Kompania është pjesë e një kontrate PPP dhe vijon të shoqërohet me paqartësi mbi përfituesit përfundimtarë, një tjetër sinjal alarmi për institucionet e kontrollit dhe organet e drejtësisë.

Pyetje që kërkojnë përgjigje

• Pse Bashkia Durrës zgjodhi procedurën me negocim të drejtpërdrejtë për një tender kaq të madh?
• Si mund të vijojë të përfitojë fonde publike një kompani në sekuestro dhe nën hetim nga SPAK?

Ky tender përbën një tjetër sinjal alarmi se skema e inceneratorëve, pavarësisht hetimeve në vijim, vazhdon të ushqehet me para publike, këtë herë nga Bashkia e Durrësit.