Shqiptari i dërgonte “pako me kocka” në shtëpi

Një 34-vjeçar shqiptar është arrestuar në Itali ndërsa shoku i tij është në ndjekje penale pasi akuzohen se kanë grabitur para nga një tregtar në shuma të mëdha.

Shqiptari emri i të cilit nuk bëhet i ditur kërcënonte tregtarin italian për t’i dhënë para, duke i marrë disa herë shuma deri në 5500 euro.

Ngjarja ka ndodhur në  Chieti në Francavilla al Mare, ku i riu së bashku me shokun e tij 24-vjeçar kishin tre muaj që shantazhonin tregtarin për t’ju dorëzuar paratë.

Frikësimi ka arritur kulmin pas veprimit të tyre të fundit, pas të cilit italiani i denoncoi në polici. Ata i dërguan një pako që përmbante kocka kafshe duke e kërcënuar me vdekje nëse nuk i paguante paratë.

Tregtari nuk i kishte asnjë lloj borxhi shqiptarit. Ata ishin takuar rastësisht verën që lamë pas në biznesin e italianit dhe që atëherë 34-vjeçari nisi pretendimet e çuditshme.

Shqiptari, i cili ka një histori të mëparshme për përfshirje në trafikun e drogës dhe krimet kundër personit, aktualisht i ishte nënshtruar shërbimit të provës, ndërsa është denoncuar gjithashtu edhe për rezistencë dhe lëndime ndaj një zyrtari publik.