Përditësuar më 12 November 2025, 19:30

Reagon ekipi i Burrelit

Një ngjarje e pakëndshme ka ndodhur mbrëmjen e kaluar në emisionin sportiv “Super Gol” në televizionin publik shqiptar. Gjatë transmetimit, moderatorja Hygerta Sako dhe të ftuarit e saj u përfshinë në një moment të papërshtatshëm, ku u bë objekt talljeje futbollisti afrikan i skuadrës së Burrelit, Arnold Kwaku Siaw, pas ndeshjes Burreli–Pogradeci (2-0).

Problemi nisi gjatë një lidhjeje direkte me lojtarin, kur pamja në ekran nuk ishte e qartë për shkak të një defekti teknik. Në vend që situata të trajtohej me seriozitet, ajo u kthye në një moment humori të pavend, duke shkaktuar të qeshura në studio. Njëri prej analistëve, Gert Haxhiu, shtoi edhe një koment që u perceptua me tone raciste, duke e përkeqësuar më tej situatën.

Moderatorja u përpoq ta kalonte momentin duke ia atribuar problemin teknik “LED-it të RTSH-së”, por pamjet tashmë kishin nisur të qarkullonin gjerësisht në rrjetet sociale, duke ngjallur reagime të shumta.

Klubi i Burrelit reagoi ashpër për incidentin, duke e cilësuar sjelljen në studio si “një akt bullizmi me prirje raciste” dhe duke theksuar se një gjuhë e tillë nuk ka vend në sport apo në shoqëri. Në deklaratën e shpërndarë në Instagram, klubi shprehu mbështetje të plotë për futbollistin, të cilin e quajti “pjesë të familjes së Burrelit” dhe një shembull profesionalizmi e përkushtimi.

Edhe trajneri i skuadrës, Samuel Nikaj, reagoi me tone të forta, duke shkruar:
“Ka njerëz që humbasin gjithçka për të mbajtur dinjitetin, dhe të tjerë që fitojnë gjithçka duke e lënë pas shpirtin.”

Klubi i kërkon RTSH-së dhe drejtuesve të emisionit të marrin përgjegjësinë për ngjarjen dhe të kërkojnë publikisht falje ndaj lojtarit dhe ekipit.