Stambolli goditet nga tërmet i fuqishëm 6.2 ballë

Një tërmet i fuqishëm me magnitudë 6.2 goditi sot qytetin e Stambollit, një nga metropolet më të mëdha dhe të rëndësishme të Turqisë.

Sipas raportimeve të para, nuk janë shënuar dëme të konsiderueshme materiale, por lëkundjet e forta kanë shkaktuar panik dhe kanë detyruar qytetarët të evakuohen nga ndërtesat. Tërmeti u ndje në të gjithë provincat e qytetit që shtrihet mes brigjeve evropiane dhe aziatike të ngushticës së Bosforit.

Sipas të dhënave zyrtare, tërmeti u regjistrua në orën 12:49 me orën lokale, me epiqendër në zonën e Silivrit, rreth 80 kilometra në perëndim të Stambollit, dhe një thellësi prej 9.92 kilometrash.

Deri më tani, raportohet për një person të lënduar, i cili mësohet se është hedhur nga ballkoni nga frika në momentin e lëkundjes. Megjithatë, autoritetet nuk përjashtojnë mundësinë që numri i të lënduarve të rritet.

Ky tërmet konsiderohet ndër më të fortët që ka goditur Stambollin në vitet e fundit, një qytet ku jetojnë rreth 16 milionë banorë.

Institucioni turk për menaxhimin e fatkeqësive natyrore, AFAD, ka këshilluar qytetarët të qëndrojnë në ambiente të hapura dhe të shmangin qëndrimin pranë ndërtesave derisa situata të qetësohet plotësisht.