Wadephul dhe Lavrov biseduan pas katër vitesh!

Ministri i Jashtëm gjerman, Johann Wadephul, ka zhvilluar një takim të papritur me homologun rus Sergej Lavrov në margjinat e Asamblesë së Përgjithshme të OKB-së në Nju Jork. Ky ishte takimi i parë dypalësh në nivel ministrash të jashtëm mes Gjermanisë dhe Rusisë që nga fillimi i pushtimit rus të Ukrainës në vitin 2022.

Sipas Wadephul, takimi 20-minutësh u realizua pas ndërmjetësimit të disa vendeve të tjera, të cilat e kishin informuar se Rusia ishte e gatshme për një bisedë. Ai tha se shumë partnerë ndërkombëtarë e kishin inkurajuar të pranonte takimin.

Gjatë diskutimeve u trajtuan tre tema kryesore:
Eksportet e drithërave nga Ukraina dhe Rusia, të cilat janë thelbësore për shmangien e krizave ushqimore.
Incidenti me dronin në aeroportin Leipzig/Halle, për të cilin Berlini fajëson Rusinë dhe tema të tjera…

Wadephul tha se i kishte bërë të qartë Lavrovit se me këtë veprim ishte “kapërcyer një vijë e kuqe” dhe se Gjermania pret që raste të tilla të mos përsëriten.

Ministri gjerman tha se mbështetja e pandërprerë e Gjermanisë për Ukrainën ka për synim fundin e luftës dhe kthiminn e Rusisë në tryezën e negociatave, sepse nuk ka asnjë justifikim për luftën.

Ministri gjerman pranoi se takimi nuk solli rezultate konkrete, por ai mbrojti rëndësinë e dialogut diplomatik. “Me miqtë nuk ke nevojë të negociosh, me kundërshtarët po,” u shpreh Wadephul, duke theksuar se komunikimi është pjesë thelbësore e diplomacisë.

Nga ana tjetër, Lavrov minimizoi rëndësinë e bisedës, duke deklaruar se nuk kishte dëgjuar asgjë të re nga pozicioni gjerman dhe se Berlini mund ta kishte komunikuar të njëjtin mesazh edhe me telefon. Por analistët theksojnë rëndësinë e vazhdimit të kontatkeve sepse çdo luftë përfundon me ndonjë marrëveshje…