Trump sulmon Melonin: Ajo është ndër më të këqijat..

Presidenti i Shteteve të Bashkuara, Donald Trump, ka sulmuar sërish kryeministren italiane Giorgia Meloni.

Duke komentuar postimin e tij të fundit në rrjetin social Truth, Trump akuzoi Melonin për një qëndrim të padrejtë ndaj Shteteve të Bashkuara dhe rolit të tyre në mbrojtjen e aleatëve.

“Siç e dini, ne po trajtohemi shumë keq, edhe nga kryeministrja juaj, e cila është sjellë shumë keq ndaj atyre që kanë shpenzuar mijëra, miliarda dollarë për të mbrojtur Italinë. Kur kërkuam thjesht një shenjë mirënjohjeje, na thanë jo. Po flas për NATO-n në përgjithësi, jo vetëm për vendin tuaj. Megjithatë, ajo ka qenë ndër më të këqijat”,deklaroi Trump.

I pyetur gjatë një interviste për Tgcom24, nëse po shqyrton mundësinë e tërheqjes së SHBA-së nga NATO, presidenti amerikan shmangu një përgjigje të drejtpërdrejtë.

“Nuk dua t’jua them”, u përgjigj ai shkurt.

Tensionet mes presidentit amerikan Donald Trump dhe kryeministres italiane Giorgia Meloni janë përshkallëzuar pas një serie deklaratash publike të shkëmbyera mes dy liderëve javën e fundit.

Në një intervistë për rrjetin televiziv amerikan NBC, Trump u shpreh kritik ndaj Melonit, duke deklaruar se ishte zhgënjyer nga qëndrimi i saj në lidhje me çështjen e Ngushticës së Hormuzit.

“Meloni më mbështeste me fanatizëm, por nuk e dua as si fanse, sepse nuk më qëndroi pranë, as ajo dhe as NATO, kur lindi çështja e Ngushticës së Hormuzit”, tha presidenti amerikan.

Më herët, Trump kishte deklaruar për median italiane La7 se kryeministrja italiane i ishte lutur për të realizuar një foto së bashku gjatë samitit të G7, duke shtuar se “i kishte ardhur keq për të”.

Deklaratat e presidentit amerikan sollën reagimin e menjëhershëm të Giorgia Melonit, e cila përmes një videoje të publikuar në rrjetin social X i cilësoi pretendimet e Trump si“një shpikje të pastër”.

“Deklaratat e Donald Trump janë një shpikje e pastër. Jam sinqerisht e habitur. Nuk e di përse presidenti i Shteteve të Bashkuara sillet në këtë mënyrë ndaj aleatëve të tij”, u shpreh Meloni.

Kryeministrja italiane shtoi se është zhgënjyese që Trump tregon më shumë tolerancë ndaj kundërshtarëve të Perëndimit sesa ndaj aleatëve tradicionalë të SHBA-së.

“Ka diçka që duhet ta kujtojë, as unë dhe as Italia nuk i lutemi kurrë askujt”, deklaroi ajo.