Vasili: Qeveritarët dhe Rama rrinë e vështrojnë… Shqipëria përmbytet

“Shqiptarët janë përfundimisht pa drejtim, gjithshka është në dorë të Zotit.” Në këtë konkluzion ka dalë kreu i Grupit të LSi, Petrit Vasili, pasi ka ndjekur njoftimet më të fundit nga përmbytjet dramatike në veri të vendit, sidomos në zonën e Shkodrës, ku bashkia prej kohësh pret dhe lut mbështetje nga qeveria.

“Është e pabesueshme kjo që po na shohin sytë, – shkruan i indinjuar Vasili në Fb. –  Përmbyten mijëra hektarë tokë, përmbyten qendrat e qyteteve, miliona euro dëme në prona dhe askush nga qeveria nuk hap gojën a thua se përmbytjet po ndodhin në një kontinent tjetër.

Kryeministri dhe qeveria rrinë e vështrojnë boll që qameti të jetë larg vetes. Turp i padëgjuar, askush nga shteti që paguajnë me djersë e gjak shqiptaret nuk interesohet për ta. Shqiptarët janë përfundimisht pa drejtim gjithçka është në dorë të Zotit,” ka theksuar Vasili.

Situata e përmbytjeve në Shkodër po bëhet dramatike orë pas orë me shtimin e reshjeve. Vetë IGJEUM, institucioni shtetëror, ka publikuar rezultatet e vëzhgimit satelitor, ku harta në veri të Shqipërisë shfaqet më së shumti ngjyrë blu, prej ujit që ka përmbytur mbi dymijë ha tokë.