Zgjedhjet pa opozitën do përkthehej në destabilitet për Shqipërinë

 Të njëjtët që deri sot në drekë bërtisnin se nuk ka asnjë problem të bëhen zgjedhjet pa opozitën, tani thonë se anullimi i zgjedhjeve në Kavajë ishte vendim i duhur pasi zgjedhjet nuk mund të mbahen pa opozitën sepse kjo do përkthehej në destabilitet. Nëse kjo do ishte kuptuar që ditën e parë, shqiptarëve do ju ishte kursyer kohë, nerva dhe para. Opozita ka kapur një pozicion bllokues. Dhe roli bllokues i minorancave kur ato kanë mundësi dhe aftësi ta ushtrojnë njihet në demokraci. Po bën mirë apo keq, e drejtë apo e gabuar, këtë do e vendosin shqiptarët kur të shkojnë të votojnë, por ajo po e bën. Opozita nuk ndryshohet në tavolinë por në kuti. Nëse shqiptarët nuk janë dakord, do e asgjësojnë me votë, por duhet të ketë zgjedhje. Nëse kori i sotëm i politikanëve dhe ambasadorëve do e kishte pranuar këtë fakt që ditën e parë, sot kriza do ishte zgjidhur sepse do ishte kursyer arroganca dhe dhuna verbale. Arroganca asnjëherë nuk ka zgjidhur probleme, ka krijuar të tjera edhe më të mëdha. Ndaj gjuhën e sotme ruajeni në vazhdim deri në zgjidhje, në të kundërt në 18 qershor porosisni një sondazh te Zaloshnja dhe quajeni proçes elektoral.