Ndahet nga jeta në moshën 35-vjeçare sipërmarrësi shqiptar

Një lajm i trishtë ka tronditur familjarët, miqtë dhe të afërmit e Arlend Prend Gjonit, i njohur nga të afërmit si Ledi, i cili është ndarë nga jeta në moshën vetëm 35-vjeçare.

Sipas njoftimit të familjes, Arlendi ka ndërruar jetë pas një ataku kardiak.

Me origjinë nga Berisha e Pukës, Gjoni kishte ndërtuar ndër vite një karrierë në fushën e biznesit dhe sipërmarrjes. Ai e kishte nisur rrugëtimin si emigrant, ndërsa më pas ishte përfshirë në iniciativa dhe investime të lidhura me teknologjinë dhe inovacionin.

Vitet e fundit, Arlendi ishte zhvendosur në Emiratet e Bashkuara Arabe, ku ishte bashkëthemelues i Prepaire Labs, një kompani që operon në zhvillimin e teknologjive në fushën e bioteknologjisë dhe inteligjencës artificiale.

Ndër projektet e kompanisë është edhe GenetiQ Digital Twin, një teknologji e konceptuar për të ndërthurur të dhëna gjenetike, metabolike, klinike, imazherike dhe biometrike, me synimin për të ndihmuar në identifikimin e hershëm të rreziqeve shëndetësore dhe në personalizimin e trajtimeve.

Të afërmit e kujtojnë Arlendin si një njeri me vizion, ambicie dhe dëshirë për inovacion, i cili pavarësisht moshës së re kishte investuar në projekte që synonin të sillnin zhvillime të reja në teknologji dhe shëndetësi.

Lajmi për ndarjen e tij të parakohshme nga jeta ka shkaktuar dhimbje te familjarët dhe rrethi i tij i miqve.

Pritja e të ndjerit do të bëhet pranë shtëpisë funerale “Alba 2000”, në rrugën e Durrësit.

Ceremonia e varrimit do të zhvillohet të dielën, më 16 gusht, në orën 13:00, pranë varrezave të Prushit, në Kombinat, Tiranë.

Ngushëllime familjes Gjoni dhe të gjithë të afërmve për këtë humbje të parakohshme.