A do arratiseshin ish-shefat e policisë po të ishte Saimiri në burg? – Nga Ergys Mërtiri

Vendimi i parlamentit për moslejimin e arrestimit të ish-ministrit Tahiri ka qenë sabotimi më i madh që i është bërë hetimit të çështjes së tij. Tahiri duhej mbajtur në izolim, për shkak se lënia e tij e lirë përbën një kërcënim për prishjen e provave dhe kjo po vërtetohet tashmë.

Tashmë, është bërë e qartë se, as Tahiri, e as njerëzit e tij, nuk po qendrojnë duarlidhur. Nëse Tahiri do të ishte sot i izoluar, njerëzit e tij do ta kishin më të vështirë të koordinohen për të reaguar e për të marrë masat për ti shpëtuar dënimit. Nëse Tahiri nuk do të ishte i lirë, me shumë siguri, të tre oficerët policisë, tashmë në kërkim, do të ishin prapa hekurave.

Vetë largimi misterioz i Tahirit jashtë shtetit, me pretendimin për t’iu gjendur pranë babait të sëmurë që kurohej në Gjermani, në një kohë kur sistemi TIMS tregon që i ati i tij ka qenë në Shqipëri gjatë kësaj kohe, ngjall dyshime serioze se ish-ministri po punon fort për të penguar hetimet. Tahiri dhe të tijët, duken sot një hap para veprimeve të prokurorisë, ndërsa strukturat e policisë vazhdojnë të punojnë për të, duke dekonspiruar gjithçka.
Vendimi i Ramës për të rrëzuar prokurorinë në kërkesën e saj për të arrestuar Tahirin ka qenë goditja më e rëndë që i është bërë hetimit. Pretendimi i grupit parlamentar të PS-së se nuk ka prova për arrestimin e tij, ka qenë një nga istrumentet retorikë për pengimin e prokurorisë.

Në fakt, arrestimi i një të dyshuari nuk bëhet pasi provohet krimi, por kur ka prova të mjaftueshme për hetim dhe kur prokuroria dyshon se hetimi në gjendje të lirë mund të sjellë: 1. Largimin e të dyshuarit për t’i shpëtuar dënimit, 2. Kryerjen e një vepre tjetër penale gjatë kohës së hetimit dhe 3. Mundësi për të prishur provat. Pikërisht, pika e tretë ishte një arsye mëse e drejtë për të legjitimuar arrestimin. Moslejimi i kësaj nga Kuvendi, po i shërben të dyshuarit të pengojë çdo gjë që mund të çojë në dënimin e tij.

Me këtë vendim, Rama e mbrojti dhe po e mbron me thonj Tahirin, megjithë kostot e mëdha që i sjell kjo gjë. Kjo provon se Rama është totalisht i përfshirë në gjithçka, përderi sa nuk po e shet “drurin e shtrembërt” në stivën e tij. Fakti që po pranon një kosto të tillë, tregon se hesapi ia nxjerr se, shitja e tij ka një kosto shumë herë më të madhe sesa mbrotja publike që i bën, duke përlyer vetveten.