Alarmi i ekspertëve: Inteligjenca artificiale mund të krijojë pandemi

Ekspertë të teknologjisë dhe sigurisë paralajmërojnë se zhvillimet e sotme në inteligjencën artificiale mund të krijojnë mundësi të rrezikshme për përdorimin e saj në prodhimin e armëve biologjike, të afta të shkaktojnë një pandemi me përmasa globale.

Në fillim të vitit, disa prej figurave më të rëndësishme në fushën e teknologjisë, bioveprimit dhe kundër-terrorizmit u mblodhën për të analizuar një skenar hipotetik, por të bazuar në aftësi reale: një pandemi botërore e shkaktuar nga një enterovirus i ri, i krijuar qëllimisht nga një grup ekstremistësh duke shfrytëzuar mjetet e AI-së.

Rezultati i analizës së tyre ishte tejet shqetësues. Grupi prej 14 ekspertësh, i cili shqyrtoi në detaje masat mbrojtëse dhe kufizimet aktuale të inteligjencës artificiale në fushën e shkencave të jetës, arriti në përfundimin se një skenar i tillë është plotësisht i mundur në vitet që vijnë. Sipas raportit të cituar nga Euronews, pandemia e simuluar—me 850 milionë të infektuar dhe 60 milionë viktima—ishte “thellësisht alarmuese” dhe kërkon “veprim të menjëhershëm politik dhe shkencor” për të shmangur rreziqe të ngjashme në të ardhmen.

Ndërsa AI po revolucionarizon mjekësinë, duke shpejtuar kërkimin shkencor, zhvillimin e barnave dhe të vaksinave, ekspertët paralajmërojnë se i njëjti progres mund të keqpërdoret. Përparimet e fundit, sipas tyre, po “shembin barrierat” tradicionale që dikur e bënin shumë të vështirë inxhinierimin e patogjenëve nga individë apo grupe me kapacitete të kufizuara.

Iniciativa për Kërcënimet Bërthamore dhe Konferenca e Sigurisë së Mynihut, organizatat që bënë të mundur këtë analizë, nënvizojnë se sot është teknikisht e mundur që mjetet biologjike ekzistuese dhe ato të mbështetura në algoritme të AI të përdoren për të krijuar patogjenë të rinj me potencial pandemik. Ajo që e shton rrezikun është fakti se sistemet aktuale të sigurisë, rregullat mbrojtëse dhe kapacitetet mbikëqyrëse nuk janë të përgatitura për përballjen me këtë lloj sfide.

Ekspertët kërkojnë ngritjen e mekanizmave të rinj globalë të kontrollit, mbikëqyrjes dhe sigurimit të përdorimit të teknologjisë, përpara se progresi i pakthyeshëm i inteligjencës artificiale të krijojë boshllëqe që mund të shfrytëzohen nga aktorë të rrezikshëm.