Banorët e Bërxullës votuan për PS-në edhe pse protestuan për muaj me radhë për pronat

Banorët e Bërxullës protestuan për mbi shtatë muaj nëpër rrugë e para institucioneve për të marrë zgjidhje në lidhje pronat, që përfshihen në projektin e rrugës Thumanë-Kashar. Ata kërkojnë dëmshpërblim sipas çmimit të tregut, por deri më tani nuk kanë gjetur asnjë zgjidhje.

Pjesa ku kalon rruga Thumanë-Kashar përfshin rreth 30 hektarë tokë dhe 20 banesa. Banorët e këtij fshati kishin paralajmëruar se do të bojkotojnë zgjedhjet. Bërxulla përfshihet në Bashkinë e Vorës, ku kandidati i PS fitoi thellë në zgjedhje.

Për të shtuar diferencën ndaj kundërshtarit kontribuoi pikërisht edhe Bërxulla, ku Blerim Shera i PS mori 2266 ose 61.11%, ndërsa Indrit Hoxha i Bashkë Fitojmë mori 1442 vota ose 38.89%. Në total në Vorë, dy kandidatët Blerim Shera dhe Indrit Hoxha e përfunduan garën me 9638 vota për Partinë Socialiste dhe 3471 për kandidatin e Bashkë Fitojmë.

Ky fakt tregon se banorët e Bërxullës ndryshe nga ç’kanë thënë, kanë shkuar në zgjedhje dhe pjesa më e madhe e tyre kanë votuar Partinë Socialiste. Çfarë ka ndodhur në prapaskenë nuk dihet, por fakt është se kjo tërheqje e tyre te kutitë e votimit e zhvlerëson gjithë mundin e shtatë muajve të mëparshëm.

Një version mund të ketë qenë edhe tërheqja e qeverisë, për t’i shpronësuar sipas çmimit të tregut, por kjo ende nuk dihet dhe asgjë nuk është bërë publike. Kjo dilemë vështirë se do të zgjidhet, por ky veprim i banorëve është një moment, që zbeh çdo kauzë të protestave popullore dhe të pavarura.